समायोजन खबर खोटाङ, खोटाङको हलेसी तुवाचुङ नगरपालिका–९ सल्लेस्थित सल्लेपोखरी सामुदायिक वनमा लागेको आगो हावाहुरीका कारण अनियन्त्रित भई गाउँबस्ती पस्दा एक करोड २३ लाखको क्षति भएको छ।

आगो अनियन्त्रित भई गाउँबस्ति पस्दा सल्लेका योग बहादुर राना मगरको एकवटा घर, अन्नपात, भाडावर्तन, लत्ताकपडा र दैनिक प्रयोगका सामग्री जलेर नष्ट हुँदा सात लाखको क्षति भएको छ।

ईन्द्र बहादुर थापाको ढुंगा माटोले बनेको फुसको छानो भएको दुईवटा घर, ढुंगा माटोले बनेको टिनको छानो भएको एकवटा घर, घरमा रहेको एक तोला सुन, अन्नपात, भाडावर्तन, लत्ताकपडा र दैनिक प्रयोगका सामग्री जल्दा ३५ लाखको क्षति भएको प्रहरीले जनाएको छ।

गोपाल बहादुर थापा मगरको दुईवटा घर, भान्साघर, अन्नपात, भाडावर्तन, लत्ताकपडा र दैनिक प्रयोगका सामग्री जल्दा २० लाख, मदन कुमार थापा मगरेको घर, मतान घर, घरभित्रको १० तोला सुन, चाँदी १० तोला, दुई थान ल्यापटप,एकथान प्रिन्टर, अन्नपात, भाडावर्तन, लत्ताकपडा र दैनिक प्रयोगका सामग्री जल्दा ३५ लाखको क्षति भएको छ।

यस्तै, खगराज बिकको घर र ग्वाली, घरमा भएको चाँदी ५ तोला, नगद २० हजार र अन्नपात, भाडावर्तन, लत्ताकपडा र दैनिक प्रयोगका सामग्री जल्दा चार लाख र भेष बहादुर राना मगरको एकवटा घर, घरमा भएको चाँदी १० तोला, अन्नपात, भाडावर्तन, लत्ताकपडा र दैनिक प्रयोगका सामग्री जल्दा सात लाखको क्षति भएको छ।

यसैगरी, झन बहादुर थापा मगरको एकवटा घर, घरमा भएको डेढ तोला सुन, डेढ तोला चाँदी, नगद एक लाख ३६ हजार, अन्नपात, भाडावर्तन, लत्ताकपडा र दैनिक प्रयोगका सामग्री र मतान घर जल्दा १५ लाखको क्षति भएको छ।
आगोबाट कूल १० वटा घर, एकवटा भान्साघर, मतान घर तीनवटा, चौपाया एकवटा जलेर नष्ट हुँदा एक करोड २३ लाखको क्षति भएको डिएसपी पुरुषोत्तम खड्काले बताए।