समायोजन खबर खोटाङ, खोटाङको साकेला गाउँपालिका–४ मात्तिममा खोले पकाउने क्रममा गोठमा आगलागी भएको छ।

स्थानीय नारदमुनि खड्काको गोठमा बुधबार मध्यान्ह १२ः३० बजे खोले पकाउने क्रममा अचानक आगलागी हुदाँ ढुंगा माटोले बनेको टिनको छानो भएको एकवटा गोठ, गोठमा बाँधिएको एकवटा गाई, एकवटा बाछि जलेर नष्ट भएको छ।

आगलागीबाट पाँच लाख ५० हजारको क्षति भएको प्रहरीले जनाएको छ । आगलागीबाट भैंसी र भैसीको पाडो जलेर घाईते भएको छ। आगोलाई ईलाका प्रहरी कार्यालय मात्तिमविर्ताबाट खटेको प्रहरी र स्थानीयले मध्यान्ह १ः१५ मिनेटमा नियन्त्रणमा लिएको थियो।

गोठमा लागेको आगो निभाउने क्रममा गोठका धनी नारदमुनि खड्काको ढाड,अनुहार र तिघ्रामा पोलेको छ। मध्यम घाईते भएका उनको स्थानीय मेडिकलमा उपचार भईरहेको खोटाङका डिएसपी पुरुषोत्तम खड्काले बताए।