समायोजन खबर खोटाङ, राष्ट्रिय स्वतन्त्र पार्टीले खोटाङमा सम्पर्क कार्यालय स्थापना गरेको छ। दिक्तेलबजारस्थित भानुचोक बरगाछीमा शुक्रबार कार्यालय स्थापना गरेको हो।

निकट भविष्यमा जिल्लाभर संगठन निर्माण गरिने भएकाले विधिवत रुपमा कार्यालय स्थापना गरिएको राष्ट्रिय स्वतन्त्र पार्टीका प्रदेश सदस्य मन्जु विष्टले जानकारी दिईन्।

विष्टका अनुसार सम्पर्क कार्यालयमा मुकुन्दकृष्ण थापा, पारस विराट र सोनामहाङ राईलाई सम्पर्क व्यक्तिको रुपमा जिम्मेवारी दिईएको छ।उनीहरुले पार्टीको वारेमा जान्न चाहाने व्यक्तिहरुलाई जानकारी दिने र सदस्य बन्न चाहने व्यक्तिहरुलाई सदस्य बन्न सहजीकरण गर्नेछ। पार्टी सदस्यको संख्या बृद्धिसँगै केन्द्रीय नेताहरुको उपस्थितीमा निकट भविष्यमा जिल्ला कार्य समिति समेत गठन गरिने र जिल्ला कार्य समितिले गाउँ, वडा, गाउँपालिका तथा नगरपालिकाहरुमा संगठन विस्तार गर्नेछ।
सम्पर्क कार्यालय स्थापनामा रास्वपाका साधारण सदस्य डा. राजकुमार राई र रास्वपा नेता गणेश बस्नेतको उपस्थिती थियो। पार्टीको सदस्यता अनलाईन प्रविधिबाट लिनुपर्ने र सदस्यताको विषयमा केन्द्रले अन्तिम टुंगो लगाउने भएकाले जिल्लाका यतिनै व्यक्तिले पार्टीको सदस्यता लिएको भन्ने बारेमा अहिले नै भन्न नसकिने जनाईएको छ।