समायोजन खबर खोटाङ, खोटाङको ऐसेलुखर्क गाउँपालिका–३ ऐसेलुखर्कमा सम्पन्न साविक वडा स्तरीय पुरुष फुटबल प्रतियोगिताको उपाधि ऐसेलुखर्क साविक वडा ४ ए ले चुमेको छ।

मंगलबार गोदाम चउरमा भएको फाइनल खेलमा ऐसेलुखर्क साविक वडा ६ लाई शुन्यका विरुद्ध १ गोलले हराउँदै ऐसेलुखर्क साविक वडा ४ ए ले प्रथम स्थान ओगटेको हो।

ऐसेलुखर्क साविक वडा ५ ए ले तेश्रो स्थानमा चित्त बुझाएको छ। प्रतियोगिताका प्रथम, दोश्रो र तेश्रोले क्रमशः १७ हजार, १३ हजार र १० हजार नगदका साथमा शिल्ड, मेडल र प्रमाणपत्र प्राप्त गरेका छन्।

प्रतियोगितामा ऐसेलुखर्क साविक वडा ४ का प्रल्हाद राईले उत्कृष्ट खेलाडीको पुरस्कार पाएका छन्। राईलाई क्रोसियामा बस्दै आएका सुजन गिरीले नगद ४ हजार पुरस्कार प्रदान गरेका हुन्।

यस्तै, अनुशासित खेलाडी ऐसेलुखर्क साविक वडा ६ का उमेश तामाङ, सर्वाधिक गोलकर्ता ऐसेलुखर्क साविक वडा ६ का सविन तामाङ र उत्कृष्ट गोलरक्षक ऐसेलुखर्क साविक वडा ४ का देवराज श्रेष्ठ भएका छन् । उनीहरुले मेडल र प्रमाण पत्र पाएका छन्।

विजयी टिम तथा उत्कृष्ट खेलाडीहरुलाई ऐसेलुखर्क गाउँपालिका उपाध्यक्ष राजेश कुमार राजभण्डारी र ऐसेलुखर्कका वडाध्यक्ष टेकेन्द्र राजभण्डारीले पुरस्कार वितरण गरेका छन्। प्रतियोगिताका लागि नमस्ते सुपर खोटाङ भोजपुर यातायात प्रालिका सुपरभाइजर चन्द्र राईले आर्थिक र भौतिक सहयोग गरेका छन्।

ऐसेलुखर्क खेलकुद विकास समितिको आयोजनामा ६ कार्तिकबाट सुरु भएको प्रतियोगितामा साविक वडा ४ र ५ बाट दुई/दुई टिम गरी ८ टिमको सहभागिता रहेको थियो। साविक वडा १, ३, ७ र ९ ले प्रतियोगितामा सहभागिता जनाएको थिएन। प्रतियोगिता सञ्चालनका लागि ऐसेलुखर्क वडाले आर्थिक सहयोग गरेको थियो।