समायोजन खबर खोटाङ, खोटाङमा उम्मेदवार विरुद्ध उजुरी नपरेको मुख्य निर्वाचन अधिकृतको कार्यालयले जानकारी दिएको छ।

आगामी मंसिर ४ गते हुने प्रतिनिधि सभा तथा प्रदेश सभा सदस्य निर्वाचन अन्तर्गत आइतबार मनोनयन दर्ता गराएका उम्मेदवारहरुको विरोधमा आज उजुरी दिन सकिने थियो। तर, खोटाङका कुनै पनि उम्मेदवार विरुद्ध उजुरी नपरेको सहायक निर्वाचन अधिकृत रामाकान्त यादवले बताए।

कुनै उम्मेदवार कानुनी रुपमा अयोग्य छ भन्ने लागेमा त्यस्ता उम्मेदवारविरुद्ध उजुरी दिनका लागि आज बिहान १० बजेदेखि दिउँसो ३ बजेसम्मको समय निर्धारण गरिएको थियो।

खोटाङबाट एक प्रतिनिधिसभाका लागि नौ जनाको उम्मेदवारी परेको थियो। प्रदेशसभा ‘क’ मा नौ जना र प्रदेशसभा ‘ख’ मा ६ जनाको मनोनयन दर्ता भएको छ।

उम्मेदवारहरुको नामावली प्रकाशन गर्न असोज २५ गते साँझ ५ बजेदेखि ७ बजेसम्म छ। आइतबार मनोनयन दर्ता गराएका उम्मेदवारहरुले आफ्नो नाम फिर्ता लिने भए असोज २६ गते बिहान १० देखि दिउँसो १ बजेसम्मको समय दिइएको छ। त्यसपछि प्रतिनिधि सभा र प्रदेश सभा सदस्य निर्वाचनमा प्रत्यक्षतर्फ प्रतिस्पर्धा गर्ने उम्मेदवारहरुको अन्तिम नामावली प्रकाशन गर्ने निर्वाचन आयोगले जनाएको छ।

अन्तिम नामावलीमा रहेका उम्मेदवारहरुलाई असोज २६ गते अपराह्न ४ बजेदेखि साँझ ७ बजेसम्म चुनाव चिह्न वितरण गरिने आयोगको कार्यतालिका छ।