समायोजन खबर खोटाङ, खोटाङबाट प्रतिनिधि सभा सदस्य र प्रदेश सभा सदस्य निर्वाचनका लागि पाँच जनाको स्वतन्त्र उम्मेदवारी परेको छ । मंसिर ४ गते हुने निर्वाचनका लागि स्वतन्त्र उम्मेदवारी दर्ता भएको हो।

मुख्य निर्वाचन अधिकृतको कार्यालयका अनुसार प्रतिनिधिसभा सदस्य निर्वाचनका लागि हलेसी तुवाचुङ नगरपालिका–५ दुर्छिमका जयन्द्रकुमार राई र हलेसी तुवाचुङ नगरपालिका–९ सल्लेका सर्वधन राईको स्वतन्त्र उम्मेदवारी दर्ता भएको छ।

यस्तै, प्रदेशसभा ‘क’ मा रावाबेंशी गाउँपालिका–२ खार्पाका सुवासकुमार पोखरेल, दिक्तेल रुपाकोट मझुवागढी नगरपालिका–१५ विजयखर्कका धर्मराज पोखरेल र हलेसी तुवाचुङ नगरपालिका–४ वडहरेका कुमारप्रसाद भट्टराईले स्वतन्त्र उम्मेदवारी दर्ता गराएका छन्।

प्रतिनिधिसभाका लागि स्वतन्त्र उम्मेदवार दर्ता गराएका कांग्रेसका महाधिवेशन प्रतिनिधि तथा पूर्वराज्यमन्त्री सर्वधन तथा प्रदेशसभा ‘क’ मा स्वतन्त्र उम्मेदवारी दर्ता गराएका कांग्रेसका महाधिवेशन प्रतिनिधि सुवासकुमार र धर्मराजले भने बाम लोकतान्त्रिक गठबन्धनबाट अन्याय भएकाले बागी उम्मेदवारी दिएको बताएको छ।

सर्वधनले बाम लोकतान्त्रिक गठबन्धन(नेकपा माओवादी केन्द्र)को प्रतिनिधिसभा उम्मेदवार रामकुमार राई पासाङ तथा सुवासकुमार र धर्मराजले बाम लोकतान्त्रिक गठबन्धन(नेकपा एकीकृत समाजवादी पार्टी)को प्रदेश ‘क’ उम्मेदवार बीरबलकाजी राई विरुद्ध वागी उम्मेदवारी दिएका हुन्।