समायोजन खबर खोटाङ, खोटाङको हलेसी तुवाचुङ नगरपालिका–८ धितुङस्थित नमुना भञ्ज्याङमा आगलागी हुंदा दुई घर र एक गोठसहित दुईवटा चौपायाँ पूर्णरुपमा जलेर नष्ट भएको छ।

सोमबार दिउँसो साढे दुई बजे आसपास भएको आगलागीबाट स्थानीय राजन सार्की र उनको छोरा सन्तोषको घर पूर्णरुपमा जलेर नष्ट भएको हो। बुबाछोराको एकै ठाउँमा भएको घरसँगै रहेको गोठबाट सुरु भएको आगोले दुबै घर पूर्णरुपमा जलेको वडाध्यक्ष टेकराज राईले जानकारी दिए।
गोठबाट पनि आगलागी कसरी भयो भन्ने यक्किन कारण पत्ता लाग्न सकेको छैन। घरधनी राजन कान्छी छोरीसँग घरमा बसिरहेको बेला आगलागी भएको हो। सन्तोष भने ससुराली गएका थिए।

आगलागीबाट घर र गोठसहित एक तोला सुन, ६० केजी चामल, ७५ हजार वरावरको भाडावर्तन, ५० हजार बराबरको लत्ताकपडा, एक मुरी मकै, तीन मुरी कोदो, दश हजार बराबरको एक थान सोलार प्यानल, एक वटा गाई र एक वटा सुंगुर पूर्णरुपमा जल्दा नौ लाख बराबरको क्षति भएको वडाध्यक्ष राईले बताए।
अग्नी पीडितहरुलाई आफन्तकोमा राख्ने तयारी भईरहेको छ । आगोलाई स्थानीयले पूर्णरुपमा नियन्त्रणमा लिएको छ।