समायोजन खबर खोटाङ, ठाउँठाउँमा झरेको पहिरोले मध्यपहाडी लोकमार्गमा यात्रा गर्नै सकस भएको छ। दिक्तेल–जयरामघाट सडकखण्डको विभिन्न स्थानमा माथिबाट पहिरो झरेर सडकमा थुप्रिएपछि साना तथा ठूला सवारी साधन आवतजावतमा सकस भएको हो।

लगातारको वर्षाले दिक्तेल–जयरामघाट सडकखण्ड अन्तर्गत हुर्लुङ, खिल्कु, बिप्लाटे, तुवाचुङडाँडा, दुर्छिम, वडहरे, च्यास्मिटार, बाहुनीडाँडामा ठूलाठूला पहिरो झरेको छ।

पहिरो सडकमा झरेपछि सवारी साधनलाई बाटो नपुग्ने समस्या छ। कतिपय टर्निङहरुमा पहिरो खसेपछि गाडीलाई टर्निङ मोड्नै गाह्रो हुने गरेको चालकहरु बताउँछन्।

पहिरो पन्छाएर एकतर्फी सवारी चल्ने सडक बनाईए पनि त्यो दिगो छैन। सामान्य वर्षाले पुनः पहिरो खस्ने र सडक बन्द हुने क्रम जारी छ।
यता, हुर्लङपाखा सामुदायिक वनमा भने सडकलाई पहिरोले तलबाट तानिरहेको छ। सडकको तल्लो भाग पहिरोले तानेपछि त्यहाँ एकतर्फी मात्रै गाडी गुड्ने र रातीको समयमा जोखिम बढेको छ।

त्यहाँ पहिरोले तलबाट सडकसँगै टेलिकमले विस्तार गरेको फाईवरको पोललाई समेत पहिरोले तानिरहेको छ। उक्त फाईवरको पोलको तार विधुतको ११ केभी लाईन पोलमा समेत टाँगिएको हुंदा विधुतको पोल ढल्ने संम्भावना बढेको छ।