समायोजन खबर खोटाङ, खोटाङमा यसवर्ष ८४ प्रतिशत धान रोपाइँ सकिएको छ। साउनको दोश्रो हप्ता सुरु हुंदासम्म जिल्लाको दश स्थानीय तहमध्ये पाँच स्थानीय तहमा रोपाइँ सकिएको छ। पाँच स्थानीय तहमा अझै रोपाइँ भईरहेको छ।

जिल्लाभर १२ हजार ८९८ हेक्टर जमिनमा धान खेती हुंदै आएको छ । कृषि ज्ञान केन्द्र दिक्तेलका कृषि प्रसार अधिकृत सञ्जयकुमार पण्डितका अनुसार जेठ अन्तिमबाट सुरु भएको रोपाइँ हालसम्म १० हजार ८४३.३२ हेक्टरमा अर्थात ८४ प्रतिशत सकिएको हो।
जिल्लाको लेकाली क्षेत्रहरुमा बेलैमा पर्याप्त वर्षा भएका कारण ऐसेलुखर्क गाउँपालिका, केपिलासगढी गाउँपालिका, साकेला गाउँपालिका, दिक्तेल रुपाकोट मझुवागढी नगरपालिका र हलेसी तुवाचुङ नगरपालिकामा रोपाइँ सकिएको छ।

बेशी क्षेत्रको रावाबेशी गाउँपालिका, बराहपोखरी गाउँपालिका, खोटेहाङ गाउँपालिका, जन्तेढुंगा गाउँपालिका र दिप्रुङ चुईचुम्मा गाउँपालिकामा रोपाइँ भईरहेको छ। ती स्थानहरुमा आकाशे पानीको भर र सिंचाई कुलो भएकाले अहिले पनि रोपाइँ भईरहेको कृषि प्रसार अधिकृत पण्डितले बताए।
जिल्लाका कृषकहरुले अटे मार्सी, ताईचुङग, मकवानपुरे, रन्जिता, खुमल–४, खुमल–८, खुमल–१०, भोटाङ्गे लगायतका धानको प्रजातीहरु रोप्ने गरेका छन्।