समायोजन खबर खोटाङ, खोटाङको खोटेहाङ गाउँपालिकाको चिप्रिङ खोलामा झोलुङगे पुलको शिलान्यास गरिएको छ। चिप्रिङ र ईन्द्रणीपोखरी जोड्ने चिप्रिङ खोलामा बिहीबार पुलको शिलान्यास गरिएको हो।

गाउँपालिका अध्यक्ष उदिम बहादुर राई र उपाध्यक्ष रुपेश राईले पुलको शिलान्यास गरेका हुन्। स्वीस सरकार अन्तर्गत हेल्भेटासको ४४ लाख ९८ हजार ५०० रुपैयाँ बजेटमा पुल निर्माण हुनेछ।

कुल वजेटमा २८ लाख ४३ हजार २७८ रुपैयाँको काम काम भने चिप्रिङ खोला झोलुङगे पुल वाल्डाँडा उपभोक्ता समितिले गर्नेछ। बाँकी रकमको भने हेल्भेटासले पुलको लठ्ठा खरीद गर्नेछ।

आयोजनामा उपभोक्ता समितिको २ प्रतिशत श्रमदान र गाउँपालिकाको १३ प्रतिशत लगानी हुनेछ। उपभोक्ता समितिले पुससम्म पुल निर्माणको काम सक्नुपर्ने उपाध्यक्ष राईले बताए।

यसअघि, सावाकटहरे र बड्कादियालेको सिमाना दुम्सा खोलामा १२० मिटर लामो झोलुङगे पुलको शिलान्यास गरिएको थियो । दुबै पुलको प्राविधिक सहयोग हिमाली क्लव दिक्तेलले गरिरहेको छ।