समायोजन खबर खोटाङ, खोटाङ कलाकार समाजले भव्य सांस्कृतिक कार्यक्रम गर्ने तयारी थालेको छ। खोटाङगे कलाकारहरुको संरक्षण र प्रवद्र्धन गर्दै आएको समाजले काठमाण्डौको प्रज्ञा भवनमा सांस्कृतिक कार्यक्रम गर्ने तयारी थालेको हो।

समाजले शुक्रबार दिक्तेलको सगरमाथा होटलमा पत्रकार सम्मेलन गर्दै १८ भदौमा काठमाण्डौको प्रज्ञा भवनमा सांस्कृतिक कार्यक्रम गर्ने तयारी गरिएको जानकारी दिएको छ। सांस्कृतिक कार्यक्रममा अनुजदेखि अग्रजसम्मका सम्पूर्ण खोटाङगे कलाकारहरुको उपस्थिति गराउने लक्ष्य रहेको समाजका महासचिव धर्मराज पोखरेलले जानकारी दिए।
एउटै स्टेजमा तीन विधाको प्रतिभा खोजिने
समाजले आगामी फागुनबाट एउटै स्टेजबाट तीन विधाको प्रतिभा खोजि गर्ने भएको छ। खोटाङ गायन प्रतियोगिता, खोटाङ नृत्य प्रतियोगिता र खोटाङ प्रतिभा २०७९ को खोजी गरिने भएको हो।
दुई नगरपालिका र आठ गाउँपालिकामा उक्त सांस्कृतिक कार्यक्रम गर्ने तयारी गरिएको छ। प्रत्येक पालिकामा गायन, नृत्य र खोटाङ प्रतिभाका एक/एक जना उत्कृष्ट प्रतिभा छनोट गरिने समाजका अध्यक्ष रुपकुमार राईले बताए।
पालिकामा उत्कृष्ट छनोट भएकाहरुलाई पनि जिल्लामा ल्याएर उत्कृष्ट प्रतिभा छनोट गरिनेछ। गायनतर्फ प्रथम हुनेलाई २ लाख, दोश्रोलाई १ लाख, तेश्रोलाई ५० हजार र सान्त्वना हुनेलाई २५ हजार नगद पुरस्कार प्रदान गरिनेछ।
यस्तै, नृत्यमा प्रथम हुनेलाई २ लाख, दोश्रोलाई १ लाख, तेश्रोलाई ५० हजार र सान्त्वनालाई २५ हजार र खोटाङ प्रतिभा पुरस्कार एक जनालाई १ लाख तोकिएको छ। जिल्लाको प्रत्येक गाउँ, नगर र बस्तीहरुमा रहेको उत्कृष्ट प्रतिभालाई खोजेर उनीहरुको कलालाई जिल्ला, राष्ट्र र अन्तर्राष्ट्रिय रुपमा चिनाउन कार्यक्रम गर्न लागिएको अध्यक्ष राईले बताए।

गायन, नृत्य र खोटाङ प्रतिभाले निरन्तर पाउने र कार्यक्रमबाट छनोट उत्कृष्ट कलाकारहरु बेवारिसे नबन्ने गरी समाजले सहयोग गर्ने अध्यक्ष राईको भनाई छ । पत्रकार सम्मेलनमा समाजका अध्यक्ष राई, महासचिव पोखरेल, सह–कोषाध्यक्ष कला राई, सदस्यहरु विना राई, अनिल राई, भुवन पारुहाङ, साइनो कला केन्द्रका अध्यक्ष प्रमोद श्रेष्ठको उपस्थिति थियो।

२०७७ असोजदेखि रुपकुमार राईको अध्यक्षतामा तदर्थ समिति गठन गरी समाजले काम गर्दै आएको छ। समाजको कार्य समितिमा १९ जना सदस्य, ८ जना सल्लाहकार, २४ जना मानार्थ सदस्य, १४ जना संरक्षक र ६ जना आजिवन सदस्य छन्।