समायोजन खबर खोटाङ, नेपाली कांग्रेस प्रदेश नं. १ कार्य समितिले निर्वाचित भएको प्रमाणपत्र लिएका छन्। संघीयतापछि प्रदेशको पहिलो ऐतिहासिक अधिवेशनबाट निर्वाचित भएका पदाधिकारीहरुले आईतबार निर्वाचन समितिबाट मोरङ कांग्रेसको पार्टी कार्यालय बिराटनगरमा प्रमाण पत्र लिएका हुन्।

निर्वाचित पदाधिकारीहरुले प्रमाणपत्र लिएपछि प्रदेश कार्य समितिको पहिलो बैठक पनि आजै बसेको छ। प्रदेश सभापति उद्धब थापाको अध्यक्षतामा बसेको बैठकले प्रदेश नं. १ का केन्द्रीय सदस्यहरु, जिल्ला सभापति, प्रदेश महाधिवेशन प्रतिनिधि, संघीय महाधिवेशन र निर्वाचन समितिलाई एकमुष्ट हार्दिक धन्यवाद आभार प्रकट गर्ने निर्णय पारित गरेको छ।

प्रदेश कार्य समितिको आउने बैठकहरुमा प्रदेश कार्य समिति सभापतिका प्रत्यासी गुरुराज घिमिरेसहित १४ जिल्लाका जिल्ला सभापतिलाई पनि बैठकमा आमन्त्रण गर्ने निर्णय भएको नेपाली कांग्रेस प्रदेश नं. १ महामन्त्री भुपेन्द्र राईले जानकारी दिनुभयो।

राईका अनुसार संघीयतापछिको पहिलो प्रदेश कार्य समिति भएकाले पार्टीलाई व्यवस्थित गर्नका लागि तत्काल पार्टी कार्यालय स्थापना गर्ने र भवन निर्माण गर्ने लगायतका महत्वपूर्ण निर्णयहरु बैठकले गरेको छ।