समायोजन खबर, नेकपा एमालेका नेता भीम रावलले गृहजिल्ला अछाम पुगेर आफ्ना कार्यकर्ताहरुलाई निराश नहुन आग्रह गर्नुभएको छ।

चितवन महाधिवेशनमा अध्यक्ष पदमा पराजित रावलले पहिलोपटक सार्वजनिक कार्यक्रममा सहभागी हुनुभएको हो।

‘हाम्रा तपाईंहरू कोही पनि निराश नहुनुहोला,’ श्रीमतीसहित पुगेका रावले भन्नुभयो, ‘राजनीतिमा अनेक घुम्तीहरू आउँछन्। उच्च मनोवल राख्नुहोस्। समाज र देशका लागि हामीले यी पाइला चालेका हौं भनेर अठोटका साथ अघि बढ्नुहोस्। मेरो साथ तपाईंहरूलाई छ।’ रावलले आफूले अध्यक्ष पदमा प्रतिष्पर्धा गरेको र हारेको बताउँदै त्यसमा मन खुम्च्याउनुपर्ने कारण नरहेको बताउनुभयो।

उहाँले भन्नुभयो, ‘मैले अध्यक्ष पदमा प्रतिष्पर्धा गरेको हो। जितिनँ। त्यसमा मन खुम्च्याउनुपर्ने कुनै कारण छैन।’ चुनावमा अध्यक्ष केपी शर्मा ओलीले जिते पनि नैतिकरूपमा भने आफूले जितेको उहाँको भनाइ छ। अध्यक्ष ओलीले पार्टीको उपाध्यक्ष र केन्द्रीय सदस्य प्रस्ताव गर्दा पनि अस्वीकार गरेको रावलले बताउनुभयो।