समायोजन खबर खोटाङ, महालेखापरीक्षकले खोटाङको बराहपोखरी गाउँपालिकाको लेखापरीक्षण थालेको छ। महालेखाले आर्थिक वर्ष २०७७/०७८ को लेखापरीक्षण गर्न थालेकोे हो।

महालेखापरीक्षकको कार्यालयका निर्देशक प्रकाश खत्री सहितको तीन जनाको टोलीले दिप्रुङ चुईचुम्मा गाउँपालिका र खोटेहाङ गाउँपालिकाको लेखापरीक्षण सकेर बुधबारदेखि बराहपोखरीको लेखापरीक्षण थालेको हो।

खत्रीको टोलीले बाँकी जन्तेढुंगा गाउँपालिका, दिक्तेल रुपाकोट मझुवागढी नगरपालिका र जलस्रोत तथा सिंचाई विकास डिभिजन कार्यालय दिक्तेलको लेखापरीक्षण गर्ने जनाएको छ।

यस्तै, महालेखापरीक्षकको कार्यालयका निर्देशक पदम प्रसाद आचार्यको टोलीले ऐसेलुखर्क गाउँपालिकाको लेखापरीक्षण सुरु गरेको छ। हलेसी तुवाचुङ नगरपालिका र रावाबेशी गाउँपालिकाको लेखापरीक्षण सकेर बुधबारदेखि ऐसेलुखर्कको लेखापरीक्षण सुरु गरेको जनाईएको छ।

आचार्यको टोलीले केपिलासगढी गाउँपालिका र साकेला गाउँपालिकाको लेखापरीक्षण गर्नेछ। भदौ अन्तिमबाट खत्री र आचार्यको टोलीले जिल्लाका स्थानीय तहहरुको लेखापरीक्षण गर्न थालेको थियो।

यो पटक भने महालेखापरीक्षकको टोली पालिकामै पुगेर लेखापरीक्षण गरिरहेको पाईएको छ। गत वर्षहरुमा महालेखापरीक्षकका कर्मचारी र पालिकाका कर्मचारी मिलेर पायक पर्ने स्थानमा बसेर लेखापरीक्षण गरेको पाईएको थियो।