समायोजन खबर खोटाङ, नेपाली कांग्रेस खोटाङको वडा अधिबेशन अन्तर्गत पाँचवटा पालिकामा सर्वसम्मत अधिबेशन सम्पन्न भएको छ। २ वडामा अधिबेशन सम्पन्न हुन बाँकी छ।

हलेसी तुवाचुङ नगरपालिका, रावावेशी गाउँपालिका, साकेला गाउँपालिका, खोटेहाङ गाउँपालिका र वराहपोखरी गाउँपालिकामा सर्वसम्मत अधिबेशन सम्पन्न भएको हो।

ऐसेलुखर्क गाउँपालिकाको वाकाचोल, केपिलासगढी गाउँपालिकाको सुङदेल र वाक्सिला, दिक्तेल रुपाकोट मझुवागढी नगरपालिकाको दिक्तेल २, दिप्रुङ चुईचुम्मा गाउँपालिकाको छितापोखरी, सप्तेश्वर छितापोखरी, टेम्मा र जन्तेढुंगा गाउँपालिकाको चिसापानी र काहुलेमा मतदान प्रक्रियाबाट अधिबेशन टुंग्याईएको छ।

दिक्तेल रुपाकोट मझुवागढी नगरपालिकाको निर्मलीडाँडामा शुक्रबारदेखि अधिबेशन स्थगित छ। दिप्रुङ चुईचुम्मा गाउँपालिकाको याम्खामा खसेको भोट भन्दा एक भोट बढी देखिएपछि मतगणना स्थगित भएको छ। खोटाङमा कांग्रेसको ६ हजार ८ सय क्रियाशिल सदस्य छन्। वडा अधिबेशनबाट २३ सदस्यीय वडा कार्य समिति र क्षेत्रिय प्रतिनिधि चुन्ने व्यवस्था छ।

आगामी १० असोजमा हुने जिल्ला अधिबेशनमा १ हजार ३९४ जना क्षेत्रिय प्रतिनिधि, वर्तमान सांसद हिरा गुरुङ, वर्तमान सभापति नरेश श्रेष्ठ, प्रतिनिधिसभाका उम्मेद्वार सरस्वती वजिमय, प्रदेशसभा उम्मेद्वार विष्णुकुमार राई, सुवास कुमार पोखरेल र समानुपाति सदस्य बीरकाजी राईले जिल्ला अधिबेशनमा सहभागि हुन पाउने छन्।