समायोजन खबर खोटाङ, खोटाङमा १२ हजार जना व्यक्तिले पहिलो मात्राको भेरोसेल खोप लगाएका छन्। दुई नगरपालिका र आठ गाउँपालिकाको ७९ वटा स्वास्थ्य संस्थावाट कोरोना भाईरस विरुद्धको खोप लक्षित वर्गका व्यक्तिहरुले लगाएका हुन्।

शनिबार र आईतबार ५५ वर्ष माथिका नागरिक, ५५ वर्ष माथिका खोप लगाउन छुटेका सवै नागरिक, शिक्षक र कर्मचारी सबै गरी लगभग १२ हजारलाई खोप दिईएको स्वास्थ्य कार्यालय खोटाङका प्रमुख पुन्यप्रसाद सिग्देल जानकारी दिए। प्रमुख सिग्देलका अनुसार खोप वितरणमा सतप्रतिशत प्रगति भएको छ।

कतिपय स्थानमा लक्षित वर्गलाई खोप लगाई सकेर खोप उपलब्धताको आधारमा अन्य व्यक्तिलाई पनि खोप दिईएको छ। अब तुरुन्तै जोन्सन एण्ड जोन्सन खोप लगाईने स्वास्थ्य कार्यालयले जनाएको छ। जोन्सन एण्ड जोन्सन खोप भने एक डोज मात्रै लगाए पुग्छ। कोभिशिल्ड र भेरोसेल खोप दुई डोज लगाउनु पर्ने स्वास्थ्य मापदण्ड छ।

जिल्लाभर योसहित हालसम्म ३० हजार हाराहारीमा कोभिशिल्ड र भेरोसेल खोप लगाईएको छ। कोभिशिल्डको दोश्रो डोज लगाउनेको मात्रा धेरै र भेरोसेल खोपको दोश्रो डोज लगाउनेको मात्रा कम रहेको स्वास्थ्य कार्यालय खोटाङका प्रमुख सिग्देलले बताए।