समायोजन खबर खोटाङ, खोटाङमा कोरोना संक्रमितभन्दा संक्रमणमुक्त हुनेको संख्या बढेको छ। आईतबार एकैदिन ८९ जना संक्रमणमुक्त भएका छन् । दिक्तेल रुपाकोट मझुवागढी नगरपालिकामा ८२ जना, हलेसी तुवाचुङ नगरपालिकामा ३ जना तथा खोटेहाङ गाउँपालिकामा ४ जना संक्रमणमुक्त भएका हुन्।

योसँगै संक्रमणमुक्त हुनेको कूल संख्या २०७ जना पुगेको छ। हालसम्म संक्रमणका कारण जिल्लामा ३ जनाले ज्यान गुमाएका छन्। स्वास्थ्यमा जटिल समस्या देखिएका दश जनालाई रिफर गरिएको छ।

आईतबार एन्टीजेन तथा पिसिआर परीक्षण गर्दा २७ जनामा संक्रमण पूष्टि भएको छ। जसमा जिल्ला अस्पतालमा ८ जना, साकेला गाउँपालिकामा १ जना, केपिलासगढी गाउँपालिका र दिक्तेल रुपाकोट मझुवागढी नगरपालिकामा २–२ जना, रावाबेशी गाउँपालिकामा १४ जनामा कोरोना भाईरसको संक्रमण देखिएको स्वास्थ्य कार्यालय खोटाङले जनाएको छ।

दुई नगरपालिका आठ गाउँपालिकामा अहिलेसम्म कूल संक्रमित संख्या ७८४ जना पुगेको छ। ५७४ जना संक्रिय संक्रमित रहेको स्वास्थ्य कार्यालय खोटाङका जनस्वास्थ्य अधिकृत एवं कोभिड फोकल पर्सन लामीछाने बताए।

हालसम्म दिक्तेल रुपाकोट मझुवागढी नगरपालिकामा १४७ जना, हलेसी तुवाचुङ नगरपालिकामा ९९ जना, साकेला गाउँपालिकामा ५६ जना, ऐसेलुखर्क गाउँपालिकामा ४८ जना, रावाबेसी गाउँपालिकामा ४९ जना, केपिलासगढी गाउँपालिमा २१ जना, खोटेहाङ गाउँपालिकामा २७ जना, जन्तेढुंगा गाउँपालिकामा ४२ जना, दिप्रुङ चुईचुम्मा गाउँपालिकामा ६१ जना र बराहपोखरी गाउँपालिकामा ९ जना संक्रिय संक्रमित छन् । संक्रमितमध्ये अधिकांश होम आइसोलेसनमा र केही भने स्वास्थ्य संस्थामा सामान्य उपचारमा रहेको स्वास्थ्य कार्यालयले जनाएको छ।