समायोजन खबर खोटाङ, खोटाङको दिप्रुङ चुईचुम्मा गाउँपालिकाले लक्षण देखिएका नागरिकको एन्टिजेन परीक्षण गर्ने भएको छ। कोभिड संक्रमण तथा नियन्त्रण कार्यदलको बैठकले ९ जेठदेखि १२ जेठसम्म सातै वडामा एन्टिजेन परीक्षण गर्ने भएको हो।

बैठकले ९ जेठमा टेम्माको जय सरस्वती प्राथमिक विद्यालयमा, याम्खाको अस्थायी कोभिड अस्पताल याम्खामा, १० जेठमा डाँडागाउँ र सप्तेश्वर छितापोखरीको स्वास्थ्य चौकीमा एन्टिजेन परीक्षण गर्ने निर्णय गरेको निमित्त प्रमुख प्रशासकीय अधिकृत मुस्ताक अहमद मन्सुरीले जानकारी दिए।

यस्तै, ११ जेठमा छोरम्बु र बतासेको स्वास्थ्य चौकीमा तथा १२ जेठमा छितापोखरीको स्वास्थ्य चौकीमा एन्टिजेन परीक्षण गरिने छ।

बैठकले गाउँपालिकाभित्र कोरोना महामारीमा खट्ने पालिका प्रहरी र स्वास्थ्य कर्मचारीहरुको एक लाखको विमा गर्ने निर्णय गरेको गाउँपालिका अध्यक्ष भुपेन्द्र राईले बताए । यस गाउँपालिकामा हालसम्म छ जना संक्रिय संक्रमित छन्।