समायोजन खबर खोटाङ, खोटाङको दिप्रुङ चुईचुम्मा गाउँपालिकाले बाहिरी जमघट नगर्न आग्रह गरेको छ। कोरोना भाईरस (कोभिड–१९) बढ्दो संक्रमणलाई मध्यनजर गर्दै पालिकाभित्रका सम्पूर्ण नागरिकहरुमा बाहिरी जमघट नगर्न आग्रह गरेको हो।

गाउँपालिका अध्यक्ष तथा कोभिड संक्रमण तथा नियन्त्रण कार्यदलका संयोजक भुपेन्द्र राईको संयोजकत्वमा आईतबार गाउँपालिकामा बसेको कोभिड संक्रमण तथा नियन्त्रण कार्यदलको वैठकले बढ्दो संक्रमणका कारण पालिकाभित्रका विभिन्न जातजाति तथा धर्मावलम्बीहरुको जातिय संस्कार संस्कृती अनुरुपमा चाडपर्व, भोजभतेर, विवाह व्रतवन्ध, कुलपुजाहरु सामाजिक दुरी कायम गर्दै स्वास्थ्य मापदण्डका उपायहरु अवलम्वन गरी आफ्नै घरभित्र मनाउने निर्णय गरेको छ।

यस्तै, वैठकले बाहिरी जमघटमा हुने नाचगान, भोजभतेर, विवाह, व्रतवन्ध, देवाली, साकेला चाड (उभौली) जस्ता कार्यहरु गर्न नपाईने निर्णय गरेको गाउँपालिका अध्यक्ष राईले बताए।