समायोजन खबर खोटाङ, यसवर्ष पनि खोटाङमा अमेरिकन फौजी किराको प्रकोप देखिएको छ। जिल्लाको दुईवटा नगरपालिका र छ वटा गाउँपालिकाको विभिन्न स्थानमा लगाएको बालीमा फौजी किराको प्रकोप देखिएको हो।

सुरुवातमा दिक्तेल रुपाकोट मझुवागढी नगरपालिका–४ खाल्ले र रावाबेशी गाउँपालिका–५ दुवेकोलको केही स्थानमा देखिएको अमेरिकन फौजी किराको प्रकोप हालसम्म ४ हजार ४१० रोपनी बालीमा फैलिएको कृषि ज्ञान केन्द्र खोटाङले जनाएको छ। यी दुई पालिकामा सबैभन्दा बढी फौजी किराको प्रकोप फैलिएको छ।

ज्ञान केन्द्रका बाली संरक्षक रामनन्दन यादवका अनुसार दिक्तेल रुपाकोट मझुवागढी नगरपालिकामा १८ सय रोपनी, रावाबेशी गाउँपालिकामा ९ सय रोपनी, साकेला गाउँपालिकामा ५ सय रोपनी, ऐसेलुखर्क गाउँपालिकामा ४ सय रोपनी, दिप्रुङ चुईचुम्मा गाउँपालिकामा ४ सय रोपनी, केपिलासगढी गाउँपालिकामा २५० रोपनी र बराहपोखरी गाउँपालिकामा १५० रोपनी क्षेत्रफलमा फौजी किराको प्रकोप देखिएको छ । हलेसी तुवाचुङ नगरपालिकाको सल्लेमा मात्रै १० रोपनी क्षेत्रफलमा यसको प्रकोप फैलिएको छ। अन्य स्थानमा देखिएको छैन।

खोटेहाङ गाउँपालिका र जन्तेढुंगा गाउँपालिकामा अहिलेसम्म फौजीको किराको प्रकोप नदेखिएको यादवले बताए। अन्य आठ पालिकामा देखिएको फौजी किराको प्रकोप बढ्दो क्रममा छ। ती स्थानमा फैलिएको किराको प्रकोप निर्मुलन गर्नलाई पालिकाहरुमा विषादी पठाइएको र प्राविधिकहरुको प्रत्यक्ष निगरानीमा छर्ने काम भईरहेको यादवले बताए।

सुरुवातमा विजयखर्कमा फौजी किराको प्रकोप देखिएको भनि रिपोर्टिङ आएको र विषादी वितरण त्यहीबाट भएको दिक्तेल रुपाकोट मझुवागढी नगरपालिकाका कृषि प्रसार अधिकृत धर्मेन्द्र कलौनीले बताए । अन्य स्थानका लागि पनि विषादी वितरण गरेर रोकथामको प्रयास भईरहेको कलौनीको भनाई छ। अन्य पालिकाहरुले पनि आफ्नै श्रोत साधन प्रयोग गरेर फौजी किराको प्रकोप नियन्त्रणको प्रयास गरिरहेको पाईएको छ।

फौजी किराले बिशेषगरी मकैको गुबा, हरियो तरकारी लगायतको १२२ जातका बाली खान मन पराउँछ । खोटाङमा दुई वर्षअघिबाट फौजी किरा देखिन थालेको कृषि ज्ञान केन्द्र दिक्तेलले जनाएको छ।