समायोजन खबर खोटाङ, खोटाङको ऐसेलुखर्क गाउँपालिकाले ज्येष्ठ नागरिक सम्मान र सुत्केरी महिला भेटघाट कार्यक्रम सुरु गरेको छ। समाजका अग्रज तथा दिग्गजको स्वास्थ्य अवस्था बुझ्न र सुत्केरी महिलालाई स्वास्थ्यकर पौष्टिक खाना वितरण गर्ने उद्देश्यले भेटघाट कार्यक्रम सुरुवात गरेको हो।

शुक्रबार ऐंसेलुखर्क र माक्पाका ज्येष्ठ नागरिकलाई सम्मान र सुत्केरी महिलालाई पौष्टिक खाना वितरण गरेर भेटघाट कार्यक्रमको सुरुवात गरिएको गाउँपालिकाका आईटी अफिसर सिजन राईले जानकारी दिए। ऐसेलुखर्क र माक्पामा भएको कार्यक्रममा उपस्थित ज्येष्ठ नागरिकलाई दोसल्ला ओढाई सम्मान तथा गएको साउनयता स्वास्थ्य संस्थामा सुत्केरी भएका महिलालाई स्थानीय घ्यु, अण्डा, गेडागुडी, नुहाउने साबुन, कपडा धुने साबुन, वच्चालाई पाउडर र नुहाउने साबुन वितरण गरिएको छ।

ऐसेलुखर्क र माक्पका ४९/४९ जना ज्येष्ठ नागरिक तथा ऐसेलुखर्कका ३१ र माक्पाका ७ जना जना सुत्केरी महिलालाई गाउँपालिका अध्यक्ष विश्वनाथ निरौला, उपाध्यक्ष पुष्पकला भुजेल, सम्बन्धीत वडाका वडाध्यक्ष लगायतले दोसल्ला ओढाई सम्मान र खानेकुरा वितरण गरेका थिए।

सातै वडाका ८० वर्षमाथिका ज्येष्ठ नागरिक र सुत्केरी महिला भेटघाट कार्यक्रम अन्तर्गत शनिबार (आज) ज्यामिरे, आईतबार जलेश्वरी, महेश्वरी तथा सोमबार राखाबाङदेल र बाकाचोलका ज्येष्ठ नागरिक र सुत्केरी महिलासँग भेटघाट कार्यक्रम तय गरिएको महिला, वालवालिका तथा ज्येष्ठ नागरिक शाखा प्रमुख चन्द्रकला राईले बताईन्।