समायोजन खबर खोटाङ, खोटाङमा जनता समाजवादी पार्टीले मसाल जुलुस निकालेको छ । ५ पुसमा प्रधानमन्त्री केपी शर्मा ओलीले हुंदै नभएको अधिकार प्रयोग गरेर संसद विघटन गरेको र संवैधानिक निकायहरुमा बलमिच्याई गर्दै नियुक्ति गरेको भन्दै दिक्तेलबजारमा मसाल जुलुस निकालेको हो ।

बुधबार साँझ दिक्तेलबजारको रत्नपार्कबाट सुरु भएको मसाल जुलुस पूरानो बेसक्याम पुगेर कोणसभामा परिणत भएको जनता समाजवादी पार्टीका केन्द्रीय सदस्य सुर्य राईले जानकारी दिए । जुलुसका क्रममा प्रधानमन्त्रीको चर्को आलोचना भएको थियो । कोणसभालाई जनता समाजवादी पार्टीका केन्द्रीय सदस्य डा. केके राईले सम्बोधन गरेका थिए ।

सरकारले गरेको असंवैधानिक कदमका विरुद्धमा जसपाले पटक–पटक विरोध गर्दै आएको छ ।