समायोजन खबर खोटाङ, खोटाङको दिक्तेल रुपाकोट मझुवागढी नगरपालिकाले विधार्थीहरुको रक्त समुह पहिचान गर्न सुरु गरेको छ । नगरपालिका मातहतका सामुदायिक र संस्थागत विद्धालयमा अध्ययनरत विधार्थीहरुको रक्त समुह पहिचान गर्न सुरुवात गरेको हो ।

मंगलबार नगरपालिकाको स्वास्थ्य शाखा र रक्त संञ्चार केन्द्रको सहकार्यमा पञ्च माविबाट रक्त समुह पहिचान अभियानको शुभारम्भ गरिएको छ । अभियानको नगरप्रमुख दिपनारायण रिजालले ब्यानर पढेर शुभारम्भ भएको घोषणा गरेका छन् ।
शुभारम्भमा पञ्च माविमा कक्षा ८ मा अध्ययनरत छात्र प्रविन आचार्य र छात्रा गंगा आचार्यको रक्त समुह पहिचान गरिएको थियो । प्रविनको ‘ओ’ पोजेटिभ तथा गंगाको ‘बि’ पोजेटिभ रक्त समुह भएको कार्डसमेत नगरप्रमुख रिजालले उनीहरुलाई वितरण गर्नुभएको छ ।

नगरपालिकाभित्रका ९३ वटा सामुदायिक १० वटा संस्थागत विद्धालयमा अध्ययनरत ८ हजार ८४६ जना विधार्थीहरुको रक्त समुह पहिचान गरिने नगरपालिकाका स्वास्थ्य शाखा संयोजक तीर्थराज आचार्यले जानकारी दिए । आचार्यका अनुसार सम्पूर्ण विधार्थीहरुको रक्त समुह पहिचान गरेर आगामी शैक्षिक सत्रदेखी विधार्थीको परिचय पत्रमा रक्त समुह उल्लेख गरिनेछ ।
रक्त समुह शुभारम्भ कार्यक्रममा प्रमुख जिल्ला अधिकारी मित्रलाल शर्मा, प्रहरी प्रमुख प्रहरी नायब उपरिक्षक नारायण प्रसाद चिमरीया, सशस्त्र प्रहरीका प्रहरी प्रमुख सरोज कार्कीको पनि रक्त समुह पहिचान गरिएको थियो ।

कोरोना भाइरस आउनुभन्दा अगाडीबाट सुरुवात भएको तर, कोरोनाका कारण स्थगीत भएको नगरपालिकाको ‘स्कुल स्वास्थ्य कार्यक्रम’ अन्तर्गत रक्त समुह पहिचान अभियान थालिएको नगरप्रमुख रिजालले बताए । संस्थागत र सामुदायिक सम्पूर्ण विद्धालयमा रक्त समुह पहिचान गरेर आगामी शैक्षिक सत्रबाट विधार्थीको आइडी कार्डमा ब्लड ग्रुप खुलाउँछौ । नगरप्रमुख रिजालले भने, जसका कारण विधार्थीको रक्त समुह के भन्ने दुविधा हट्नेछ ।

रक्त समुह पहिचान गर्ने काम निक्कै महत्वपूर्ण भएको बताउँदै नगरप्रमुख रिजालले अब शिक्षा क्षेत्रमा कडा अनुगमन गरिने बताएका छन् । शिक्षा क्षेत्रमा कडा अनुगमन गर्छौ । राम्रो गर्नेलाई पुरस्कृत गर्छौ र नराम्रो गर्नेलाई दण्डीत गर्छौ ।