समायोजन खबर खोटाङ, नेपाली कांग्रेस क्षेत्रीय कार्य समिति क्षेत्र नं. १ ले संसद विघटनको विरुद्धमा विरोधसभा गर्ने भएको छ । क्षेत्रीय कार्य समितिले २५ पुसमा रावावेंशी गाउँपालिकामा विरोधसभा गर्ने भएको हो ।

केपिलासगढी गाउँपालिकाको वाक्सिलामा २१ पुसमा वसेको क्षेत्रीय कार्य समितिको वैठकले रावावेंशी गाउँपालिकामा २५ पुसमा संसद विघटनको विरुद्धमा चर्को विरोध गर्ने र ३ माघमा क्षेत्र नं. १ भित्र पालिका स्तरीय विरोध सभा गरिने क्षेत्र नं.१ का क्षेत्रीय सभापति इवन राईले जानकारी दिनुभयो ।

सभापति राईका अनुसार पालिका स्तरीय विरोध सभालाई प्रभावकारी वनाउन क्षेत्रीय कार्य समितिका पदाधिकारी खटाउने निर्णय वैठकले गरेको छ ।

ऐसेलुखर्क गाउँपालिकामा क्षेत्रीय सचिव इश्वर राई, केपिलासगढी गाउँपालिकामा क्षेत्रीय सचिव ज्ञानु पाण्डे, रावावेंशी गाउँपालिकामा सदस्य पुन्य पाण्डे, हलेसी तुवाचुङ नगरपालिकामा क्षेत्रीय उपसभापति मोहन गुरुङ र दिक्तेल रुपाकोट मझुवागढी नगरपालिकामा सदस्य अन्जना केसीलाई विरोध सभा प्रभावकारी वनाउन प्रतिनिधि तोकिएको छ ।
नेपाली कांग्रेसले संसद विघटनलाई असंवैधानिक र अलोकतान्त्रिक भनेको छ ।२०७७ पुस २२ गते साँझ ७ :५८ मा प्रकाशित