समायोजन खबर खोटाङ, खोटाङको दिक्तेल रुपाकोट मझुवागढी नगरपालिकाले आफ्नै प्रशासकीय भवनबाट सेवा प्रवाह सुरु गरेको छ ।

बिहीबार जिल्ला प्रशासन कार्यालय नजिकै निर्माण सम्पन्न भएको सुविधा सम्पन्न भवनको उद्घाटन गर्दै नगरपालिकाले आफ्नै प्रशासकीय भवनबाट दैनिक सेवा प्रवाह गरेको हो ।

जिल्ला प्रशासन कार्यालयको जग्गामा निर्माण भएको भवन संघीय मामिला तथा सामान्य प्रशासन मन्त्रालय, १ नम्बर प्रदेश सरकारको निर्णय, नगरसभा र कार्यपालिकाको निर्णय अनुसार जिल्ला प्रशासन कार्यालयले भोगाधिकार हस्तान्तरण गरेपछि भवनको उद्घाटन गरी दैनिक सेवा प्रवाह सुरु गरिएको नगरप्रमुख दिपनारायण रिजालले जानकारी दिनुभयो ।
प्रशासकीय भवनको प्रतिनिधिसभा सदस्य विशाल भट्टराईले उद्घाटन गरेका हुन् । उद्घाटनपछि भवन निर्माण कम्पनी शिवखिम्ती कन्ट्रक्सन प्रालिले नगरप्रमुख रिजाललाई चाबी हस्तान्तरण गरेका छन् ।

यसअघि यो नगरपालिकाले वार्षिक १६ लाख ८५ हजार भाडा तिरेर व्यक्तिको घर भाडामा लिएर दैनिक सेवा प्रवाह गर्दै आएको थियो ।
नयाँ भवनबाट स्वास्थ्य शाखा बाहेकका सम्पूर्ण काम कारवाही एकै स्थानबाट हुने नगरप्रमुख रिजालले बताउनुभयो ।२०७७ पुस २ गते दिउँसो ४ :५५ मा प्रकाशित