समायोजन खबर खोटाङ, खोटाङको दिक्तेल रुपाकोट मझुवागढी नगरपालिकाले १४७ जनाको स्वाव संकलन गरेको छ । पछिल्लो समय नगरपालिकामा कोरोना संक्रमण दर बढ्दै समुदायस्तरमा फैलिएकाले संक्रमित व्यक्तिहरुसँग सम्पर्क र संसर्ग भएकाहरुको सोमबार स्वाव संकलन गरिएको हो ।

जिल्ला समन्वय समिति प्रमुख, प्रमुख जिल्ला अधिकारी, सहायक प्रमुख जिल्ला अधिकारी र प्रहरी नायब उपरिक्षकमा कोरोना पुष्टि भएपछि ६७ जनाको पिसिआर गर्दा १५ जनामा कोरोना संक्रमण देखिएको र ति संक्रमितहरुको कन्ट्रयाक ट्रेसिङमा परेकाहरुको स्वाव संकलन गरिएको दिक्तेल रुपाकोट मझुवागढी नगरपालिकाका स्वास्थ्य संयोजक तीर्थराज आचार्यले जानकारी दिए ।

स्वास्थ्य संयोजक आचार्यका अनुसार कन्ट्रयाक ट्रेसिङमा परेकामा बृद्ध, बच्चा र लक्षण देखिएका छन् । यस्तै, स्वास्थ्यकर्मी, सुरक्षाकर्मी, जनप्रतिनिधि, पत्रकार, व्यवसायीको पनि आजै स्वाव संकलन गरिएको छ ।

संकलन गरिएको १४७ वटा स्वाव मंगलबार पिसिआर परिक्षणका लागि प्रादेशिक प्रयोगशाला विराटनगर पठाइनेछ । स्वाव संकलन गरिएका व्यक्तिहरुको पिसिआर परिक्षण रिपोर्ट नआएसम्म कोहीसँग सम्पर्क र सम्बन्धमा नरहन तथा उच्च स्वास्थ्य सतर्कताका साथ सुरक्षित हुन नगरपालिकाले आग्रह गरेको छ ।

यस्तै, केहीदिन अघि हलेसी तुवाचुङ नगरपालिका–७ महादेवस्थानका एक पुरुष र एक महिलामा कोरोना पुष्टि भएपछि कन्ट्रयाक ट्रेसिङ अन्तर्गत २१ जनाको स्वाव संकलन गरिएको छ । उच्च जोखिममा रहेकाहरुको सोमबार स्वाव संकलन गरेर पिसिआर परिक्षणका लागि प्रादेशिक प्रयोगशाला विराटनगर पठाइएको हलेसी तुवाचुङ नगरपालिकाका स्वास्थ्य सह–संयोजक प्रकाश घिमिरेले जानकारी दिए ।
२०७७ कार्तिक १७ गते साँझ ७ :३७ मा प्रकाशित