समायोजन खबर खोटाङ, हिउँद लागेसँगै खोटाङको हलेसी तुवाचुङ नगरपालिका–५ दुर्छिम (छापडाँडा) र खोटेहाङ गाउँपालिका–९ लिच्कीराम्चेकोे रसुवासम्म सिधा वस सेवा सुरु भएको छ । यात्रुहरुको समस्यालाई मध्यनजर गर्दै तथा चाडबाडलाई लक्षित गरेर दैनिक वस सेवा सुरु गरिएको हो ।

आइतबार हलेसी तुवाचुङ नगरपालिका–११ राजापानी भाडबेंशीमा एक कार्यक्रमको आयोजना गरी विधिवत रुपमा वस सेवाको उद्घाटन गरिएको छ । स्थानीय ९९ वर्षीया तुलसा बुढाथोकी, हलेसी तुवाचुङ नगरपालिकाका नगरप्रमुख इवन राई, उपप्रमुख बिमला राईले एकसाथ वससेवाको उद्घाटन गरेका थिए ।

वस दुर्छिम छापडाँडाबाट–हलेसी–धितुङ–भाडबेशी–रेग्मीटार–भण्डारेघाट–रमाईलो हुँदै रसुवासम्म सञ्चालन हुने खोटाङ यातायात प्रालिका वरिष्ठ उपाध्यक्ष तथा कार्यवहाक अध्यक्ष टेकेन्द्र राईले जानकारी दिए । दुर्छिमको छापडाँडाबाट दैनिक बिहान ६ बजे रसुवाका लागि वस छुट्ने छ भने रसुवाबाट दुर्छिमका लागि बिहान साढे ११ बजे वस छुट्नेछ ।

कोभिडका कारण सरकारले तोकेको भाडाका अलवा दुर्छिम छापडाँडाबाट रसुवासम्मका लागि ४५० रुपैयाँ भाडा निर्धारण गरिएको प्रालिका वरिष्ठ उपाध्यक्ष राईले बताए । फोक्सिङटारस्थित सुनकोशी नदीमा बेलिब्रृज जडान भएपछि छापडाँडा–गाईघाट सिधा वस सञ्चालिन गरिने प्रालिले जनाएको छ ।

वस सञ्चालन भएपछि स्थानीयहरु हर्षित भएका छन् । कठिन यात्रा गरिरहेका सर्वसाधरणको यात्रा सहज भएको छ । दैनिक वस सेवा सुरु भएपछि स्थानीयले उत्पादन गरेको अन्न, फलफुल लगायत बाहिर निर्यात हुने अपेक्षा गरिएको छ ।२०७७ असोज २५ गते साँझ ७ :२३ मा प्रकाशित