समायोजन खबर खोटाङ, खोटाङमा पुनः एकजनामा कोरोना भाइरस (कोभिड–१९) को संक्रमण पुष्टि भएको छ । खोटेहाङ गाउँपालिका–७ खोटाङबजारका एक जना पुरुषमा कोरोना भाइरसको संक्रमण पुष्टि भएको हो ।

शंकास्पद ब्यक्तिहरुको स्वाव संकलन गरी असोज २० गते पिसीआर परिक्षणमा पठाइएको ३९ जनामा १ जनाको पिसीआर रिपोर्ट पोजेटिभ आएको खोटेहाङ गाउँपालिका अध्यक्ष प्रदीप राईले जानकारी दिए । संक्रमित पुरुष जन्तेढुंगा गाउँपालिका–५ चिसापानीका दुईजना संक्रमितसँगै गाउँ आएको बुझिएको छ ।

संक्रमित ति पुरुषलाई होम आइसोलेसनमा बस्न भनिएको र उनको घर सिल गर्ने तयारी भएको गाउँपालिका अध्यक्ष राईले बताए । योसँगै उक्त गाउँपालिकामा संक्रमितको संख्या चार जना पुगेको छ । यसअघि इन्द्रेणीपोखरी, लिच्कीराम्चे र सावाकटहरेका एक/एक जना पुरुषलाई कोरोना पोजिटिभ देखिएको थियो ।

खोटेहाङमा पुनः संक्रमित थपिएसँगै जिल्लाबाट पिसीआर परिक्षणमा पठाएर कोरोना पोजेटिभ देखिनेको संख्या २९ पुगेको छ । काठमाण्डौमा पिसीआर परिक्षण गराएर पोजेटिभ भएका एकजना पुरुष भने जिल्ला अस्पतालको आइसोलेसनमा उपचाररत रहेको जिल्ला अस्पताल खोटाङका मेडिकल अधिकृत शैलेस श्रेष्ठले बताए ।२०७७ असोज २५ गते अपरान्ह ३ :३१ मा प्रकाशित