समायोजन खबर खोटाङ, खोटाङको रावाबेशी र ऐसेलुखर्क गाउँपालिकाले सडक मर्मतको काम सुरु गरेको छ । अविरल बर्षाका कारण पहिरो, ढिस्को खसेर आवतजावत नै बन्द भएपछि सडक मर्मतको काम थालेका हुन् । दुवै गाउँपालिकाले आ–आफ्नो क्षेत्रमा भएको सडकको पहिरो, ढिस्को पन्छाउने काम धमाधम गरिहरेको हो ।

रावाबेशी गाउँपालिकाले कुभिण्डे, हौचुर र जालपा पुछारसम्म सडक मर्मत गर्न थालेको छ । रिङरोडको अवधारणा राखेर पालिकाले नै निर्माण गरेको सडकमा बस चलाउने उद्देश्य र नजिकिदो चाडबाडलाई मध्यनजर राखेर सडक मर्मत गर्न थालिएको गाउँपालिका अध्यक्ष लिलानाथ निरौलाले बताए । गाउँपालिकाको जेसिभि र स्काभेटर प्रयोग गरेर ५ किलोमिटर जति सडक मर्मत गरिनेछ ।

ऐसेलुखर्क गाउँपालिकाले भने माक्पाको रातमाटे पाखामा झरेको पहिरो पन्छाउने काम गरिरहेको छ । यस ठाउँमा यसअघि २ पटक पहिरो पन्छाएर केही गाडी पास गराए पनि असोज ९ र १० गते परेको पानीका कारण पुन : पहिरो झरेपछि पन्छाउने काम भइरहेको गाउँपालिका अध्यक्ष विश्वनाथ निरौलाले बताए ।

रातमाटे पाखामा फेरी पहिरो गएको छ । आवतजावत नै अवरुद्ध भएपछि अलिक हिलाम्मे भएकाले पर्खदै पन्छाउने काम गरिरहेका छौ । अध्यक्ष निरौलाले भने । ‘यसरी गर्दा अलिक दिगो हुने अपेक्षा छ ।’

चाडबाड नजिकिएसँगै र हिउँद लागेपछि स्थानीय तहहरुले ग्रामिण सडकहरु मर्मत गर्न थालेका छन् । दिप्रुङ चुइचुम्मा गाउँपालिकाले पनि पालिकाभित्र रहेका ट्याक्टर व्यवसायीसँग सहकार्य गरेर मुख्यमुख्य ग्रामिण सडकमा भएको खाल्डाखुल्डी पुर्ने काम गरिरहेको छ ।२०७७ असोज १४ गते मध्यान्ह १२ :२८ प्रकाशित