चिसाङ शेर्पा खोटाङ, खोटाङमा ७४ वर्षीया विवा माझीले नेपाली नागरिकता पाएकी छन् । रावाबेंशी गाउँपालिका–३ लामिडाँडा हलिवनका माझीले शनिबार आफ्नै घरमा नेपाली नागरिकता पाएकी हुन् । उनी आँखा देख्न सक्दिनन् ।
बृद्ध, अशक्त तथा अपांगता भई हालसम्म जिल्ला प्रशासन कार्यालय दिक्तेलमा उपस्थित भई नागरिकता लिन नसकिरहेका माझीसहित ४ जनालाई स्थलगत अनुगमन गरी नेपाली नागरिकता प्रदान गरिएकोे जिल्ला प्रशासन कार्यालयले जनाएको छ ।

प्रमुख जिल्ला अधिकारी शालिग्राम शर्मा पौडेलको नेतृत्वमा गएको टोलीले माझीसहित लामिडाँडा भालुढुंगाका ७१ वर्षीया फुल कुमारी माझी, ६८ वर्षीया खरा माझी र तिर्पाका २२ वर्षीय रेवत मगरलाई नागरिकता प्रदान गरेको रावाबेंशी गाउँपालिकाका कम्प्युटर अपरेटर नर बहादुर श्रेष्ठले बताए ।
फुलकुमारी दिर्घ रोगी हुन् । अन्य सबै अपांग हुन् । उनीहरुलाई रावाबेशी गाउँपालिका अध्यक्ष लिलानाथ निरौला, प्रजिअ पौडेलले नागरिकता हस्तान्तरण गरेका छन् ।२०७७ भदौ ६ गते राती ९ :३० मा प्रकाशित