समायोजन खबर खोटाङ, कोरोना संक्रमणबाट मकवानपुरको हेटौडा र मोरङको बिराटनगरमा एक/एक जनाको मृत्यु भएको छ । गएराति हेटौडा उपमहानगरपालिका–१ का ६१ वर्षीय वृद्धको मृत्यु भएको हेटौडा–४ स्थित आइसोलेशन कक्षका इञ्चार्ज भोला चौलागाईले जानकारी दिए ।

किटजन्य रोग अनुसन्धान तथा तालिम केन्द्र हेटौडामा रहेको कोरोना प्रयोगशालामा स्वाबको पिसिआर परीक्षण गर्दा उक्त मृत्यु भएका व्यक्तिमा कोरोना सङ्क्रमण भएको पुष्टि भएको छ । मृतक लामो समयदेखि उच्च रक्तचाप र मिर्गौला रोगबाट पीडित थिए।

यस्तै,मोरङको बिराटनगरमा कोरोनाका कारण थप एक जनाको ज्यान गएको छ । बुढीगंगा गाउँपालिका–२ की ६५ वर्षीया महिलाको ज्यान गएको हो ।
गएको साउन २५ गते विराट मेडिकल कलेजमा भर्ना भएकी ती महिलालाई फेरि २७ गते कोशी अस्पतालमा भर्ना गरिएको थियो । कोरानाको रिपोर्ट नेगेटिभ आएपछि घर लगिए पनि स्वास्थ्यमा थप समस्या देखिएपछि सोमबार राति विपी कोइराला स्वास्थ्य विज्ञान प्रतिष्ठानमा भर्ना गरिएकोमा गएराति ज्यान गएको हो ।
प्रतिष्ठानमा भएको कोरोना परीक्षणमा उहाँको रिपोर्ट पोजेटिभ आएको थियो । रिपोर्ट आएलगत्तै ज्यान गएको प्रतिष्ठानका प्रवक्ता डाक्टर निदेश सापकोटाले जानकारी दिए ।२०७७ भदौ ३ गते अपरान्ह ३:२७ मा प्रकाशित