समायोजन खबर खोटाङ, खोटाङको दिप्रुङ चुइचुम्मा गाउँपालिकाले भारत तथा तेश्रो मुलुकबाट आउने नागरिकलाई दुई स्थानमा रहेको क्वारेन्टाइनमा राख्ने भएको छ । भारत तथा तेश्रो मुलुकमा अलपत्र परेका नेपालीहरुलाई सरकारले उद्धार गर्न लागेकाले उनीहरुलाई राख्नका लागि गाउँपालिकाले दुई स्थानको क्वारेन्टाइन तोकेको हो ।
सोमबार गाउँपालिकाको सभाहलमा बसेको कोरोना भाईरस संक्रमण तथा नियन्त्रण सम्बन्धी कार्यदलले अब भारतबाट पालिका भित्रनेले बतासेको भण्डारेघाटको क्वारेन्टाइन र तेश्रो मुलुकबाट पालिका भित्रनेहरु याम्खा स्वास्थ्य चौकीमा बनाइएको क्वारेन्टाइनमा राख्ने निर्णय गरेको गाउँपालिकाका सूचना अधिकारी मणिचन्द्र राईले जानकारी दिए । त्यसको लागि सम्पूर्ण तयारी पूरा भएको छ ।

यस्तै, देशकै विभिन्न क्षेत्रबाट गाउँपालिका भित्रनेहरुलाई पालिकाले तोकेको क्वारेन्टाइनमा राख्ने निर्णय भएको छ । लुकिछिपी प्रवेश गर्नेलाई विभिन्न वडामा रहेको क्वारेन्टाइनमा राखिनेछ । ७ वडा रहेको गाउँपालिकाले ६ वडामा क्वारेन्टाइन निर्माण गरेको छ ।
अब उपरान्त गाउँपालिकामा वसोवास गर्नेगरी प्रवेश गर्ने नागरिकहरुलाई तोकिएको क्वारेन्टाइनमा राखेर संक्रमण फैलिन नदिन स्थान तोकिएको गाउँपालिका अध्यक्ष भुपेन्द्र राईले बताए ।२०७७ जेठ १९ गते राती ८ :५० मा प्रकाशित