समायोजन खबर खोटाङ,खोटाङको दिप्रुङ चुइचुम्मा गाउँपालिका–४ बतासेस्थित इजाराका चारवटा कृषक समुहलाई उन्नत जातको कागतीको विरुवा वितरण गरिएको छ । कागती पकेट विस्तार कार्यक्रम अन्तर्गत आइतबार ‘बिजु सुन कागती १’,को विरुवा वितरण गरिएको हो ।
गाउँपालिकाको आर्थिक बर्ष २०७६/०७७ को वार्षिक कृषि तथा पशु विकास कार्यक्रम अन्तर्गत कागती पकेट बिस्तार कार्यक्रमका लागि गाउँपालिकाको २ लाख ४० हजार अनुदान र चार समुहको ४८ हजार लगानीमा धनकुटाबाट कागतीको विरुवा खरीद गरेर हरियाली कृषक समुह बतासे इजारा, राम्चे हरियाली कृषक समुह, देविस्थान कृषक समुह, खावासी कृषक समुहलाई प्रति समुह ८७५ वटाका दरले विरुवा वितरण गरिएको गाउँपालिकाका कृषि प्राविधिक लक्ष्मीप्रसाद रेग्मीले जानकारी दिए ।

गाउँपालिका र समुहको २ लाख ८८ हजार मध्येबाट १ लाख ५ हजारको ३ हजार ५ सय वटा कागतीको विरुवा खरीद गरेर ल्याई समुहलाई वितरण गरिएको हो । विरुवा बतासेका वडाध्यक्ष लोकेन्द्र राई, गाउँपालिकाका कृषि प्राविधिक लक्ष्मीप्रसाद रेग्मी लगायतले वितरण गरेका हुन् ।
तराईबाट खाद्यान्न लगायत सामान बोकेर आउने मालबाहक सवारी साधनलाई कृषिजन्य उत्पादनले भरेर पठाउनू पर्छ भन्ने उद्देश्यले कागती पकेट क्षेत्रको रूपमा सुरुवात गरिएको गाउँपालिका अध्यक्ष भुपेन्द्र राईले बताए ।२०७७ जेठ १८ गते साँझ ५ :५७ मा प्रकाशित