समायोजन खबर खोटाङ, खोटाङको ऐसेलुखर्क गाउँपालिकामा दुई जनाको र्‍यापिड डाइग्नोस्टिक टेष्ट (आरडिटि) रिपोर्ट ‘पोजेटिभ’ आएको छ । गाउँपालिकाले शुक्रबार गरेको आरडिटि परिक्षणमा एकजना स्वास्थ्यकर्मी र एकजना वडा सचिवको आरडिटि रिपोर्ट ‘पोजेटिभ’ आएको हो ।
गाउँपालिकाले स्वास्थ्यकर्मी, जनप्रतिनिधि, सुरक्षाकर्मी, कर्मचारी गरी ४८ जनाको आरडिटि टेष्ट गरेको गाउँपालिकाले जनाएको छ । दुई जनामा आरडिटि पोजेटिभ देखिएपछि अर्को आदेश नभएसम्मका लागि गाउँपालिका सिल गरिएको छ ।
गाउँपालिकामा सवारीसाधन आवतजावत, व्यापार, व्यवसाय नगर्न/नगराउन पनि पालिकावासीलाई आग्रह गरिएको छ । साथै गाउँपालिकाबाट प्रदान गरिने सवै सेवा अर्को सूचना नआएसम्मका लागि बन्द गरिएको गाउँपालिका अध्यक्ष विश्वनाथ निरौलाले बताए ।
२०७७ जेठ १६ गते साँझ ५ :१४ मा प्रकाशित