चिसाङ शेर्पा खोटाङ, स्वास्थ्य तथा जनसंख्या मन्त्रालय स्वास्थ्य सेवा विभागबाट प्राप्त स्वास्थ्य सामग्रीहरु जिल्ला अस्पताल खोटाङलाई हस्तान्तरण गरिएको छ । कोरोना भाइरस (कोभिड–१९) बाट बच्न र यसको परिक्षणको दायरा बढाउन स्वास्थ्य सामग्रीहरु हस्तान्तरण गरिएको हो ।
खोटाङबाट निर्वाचित प्रतिनिधिसभा सदस्य विशाल भट्टराईको पहल र समन्वयमा मन्त्रालयबाट प्राप्त भएको १७ हजार ६२८ रुपैयाँको ८ लिटर सेनिटाइजर, १० लाख ८५ हजार बराबरको ५ सय थान (भिटिएम)पिसिआर टेष्ट किट , ५ सय थान आरडिटी टेष्ट किट, ५० थान गाउन, फेस सिल्ड २० पिस, एन ९५ मास्क ५० थान, सर्जिकल क्याप ५० थान, सर्जिकल मास्क १ हजार थान, ग्लोव्स १ सय जोर, सेफ्टी चश्मा ३० थान, सू कभर ५० जोर, थर्मोमिटर २० थान बिहीबार जिल्ला अस्पतालको प्राङगणमा प्रतिनिधिसभा सदस्य भट्टराईले अस्पताल सञ्चालन तथा व्यावस्थापन समितिका अध्यक्ष बबि चाम्लिङ्लाई हस्तान्तरण गरेका हुन् ।
हलेसी तुवाचुङ नगरपालिका–७ महादेवस्थानमा एकजना युवामा कोरोना भाइरस संक्रमण देखिएको र जिल्ला बाहिरबाट ठूलो संख्यामा नागरिकहरु भित्रिएको खबरले कोभिड–१९ ले खोटाङ पनि कुनै न कुनै हिसाबले प्रभावित भएको छ भनेर सरकारसँग आग्रह गर्दा स्वास्थ्य मन्त्री र स्वास्थ्य विभागले सकारात्मक रुपमा लिनु भएकाले स्वास्थ्य सामग्री प्राप्त गरिएको प्रतिनिधिसभा सदस्य विशाल भट्टराईले बताए । यो आफैमा पर्याप्त हैन, अहिलेका लागि पर्याप्त हो तर, भविष्यका लागि अपुग छ । प्रतिनिधिसभा सदस्य भट्टराईले भने, “आगामी दिनमा यसलाई थप गर्नका लागि निरन्तर पहल कदमी गरिरहनेछौ ।”
संकास्पद र संम्भावित व्यक्तिहरु विरामीहरुलाई ट्रेसिङ गरेर छिटोभन्दा छिटो टेष्ट गर्ने काम तीव्रगतीमा बढाउनुपर्ने भट्टराईको भनाई छ । १ नम्बर प्रदेशमा तीन ठाउँमा कोरोना परिक्षण भइरहेको र, अझै थुप्रै स्थानमा परिक्षण विस्तार गरिनुपर्ने उनले बताए । विगतमा प्रदेश सरकारबाट पाप्त भएको स्वास्थ्य सामग्रीहरु दुई नगरपालिका, आठ गाउँपालिकालाई समानुपातिक हिसाबले वितरण भएको र अहिले पनि त्यसरी नै वितरण गरिने अस्पताल सञ्चालन तथा व्यवस्थापन समिति अध्यक्ष बबि चाम्लिङले बताए । कतिपय पालिकाहरुले आफैले स्वास्थ्य सामग्री खरीद गरेको र कतीपय पालिकाले कम खरीद गरेको अवस्था छ । त्यही हिसाबले आवश्यकता र औचित्यको आधारमा दश वटा स्थानीय तहलाई स्वास्थ्य सामग्री वितरण गरिनेछ । जिल्ला अस्पतलालाई आवश्यक पर्ने पिपिई लगायत सामग्री अस्पतालमा राख्छौ । अस्पताल सञ्चालन तथा व्यवस्थापन समिति अध्यक्ष चाम्लिङ्ले भने, ‘बाँकी सामग्रीहरु आवश्यकता र औचित्यका आधारमा दशै वटा स्थानीय तहलाइ वितरण गर्छौ ।’ कोरोना भाइरसले प्रभावित बनाएको खोटाङमा आगामी दिनहरुमा पनि संकास्पद र संम्भावितहरुलाई द्रुत ट्रेसिङ, कोरोना परिक्षणको दायरा बढाउने, स्वास्थ्य सामग्रीहरु जुटाउनेजस्ता काममा सवैजना एकजुट भएर लाग्नुपर्ने देखिएको छ । २०७७ जेठ ८ गते दिउँसो १ :१५ मा प्रकाशित