समायोजन खबर खोटाङ, नेपाल विद्यार्थी संघ (नेविसंघ) खोटाङले लकडाउनमा रहेका एसइई परिक्षार्थीका लागि ‘रेडियो ट्युसन कार्यक्रम’ सुरु गरेको छ । कोरोना भाइरसको संम्भावित संक्रमण न्यूनीकरणका लागि गरिएको लकडाउनले शैक्षिक सत्र २०७६ को एसइई परिक्षा स्थगित भएपछि परिक्षार्थीहरुलाई लक्षित गर्दै रेडियो ट्युसन कार्यक्रम’ सुरु गरेको हो ।

नेविसंघले शनिबार ५१ औं स्थापना दिवसको अवसरमा सम्पूर्ण तयारी गरेर आईतबारदेखी रेडियो ट्युसन कार्यक्रमको सुरुवात गरेको नेविसंघका जिल्ला सभापति राजकुमार बस्नेतले बताए । उनका अनुसार सामुदायिक रेडियो हलेसी एफएम १०२.४ मेघाहर्जबाट दैनिक बिहान ९ : १५ देखी १० वजेसम्म गणित, अंग्रेजी र बिज्ञान बिषयको बिषयगत शिक्षकहरुद्वारा रेडियोबाट अध्यापन गराइने छ ।

शैक्षिक सत्र २०७६ को एसइई परिक्षा चैत्र ६ गतेबाट गर्ने मिति तय भएको थियो । तर, कोरोना भाइरसको संन्त्रास फैलिएपछि चैत्र ५ गते सरकारले अर्को सूचना जारी नभएसम्मका लागि एसइई स्थागित गरेको थियो । खोटाङबाट ३ हजार ६ सय ८४ जनाले एसइई परिक्षा दिने तयारीमा थिए । २०७७ बैशाख ७ गते बिहान ९ : १७ मा प्रकाशित