चिसाङ शेर्पा खोटाङ, खोटाङको दिक्तेल रुपाकोट मझुवागढी नगरपालिकाले नगरभित्रका घरधनीलाई चैत महिनाको घरभाडा छुट गर्न आग्रह गरेको छ । कोरोना भाइरसको सम्भावित संक्रमण न्यूनीकरणका लागि गरिएको लकडाउन अवधिमा सवै गतिविधि ठप्प भएकाले घरभाडा छुट गर्न अनुरोध गरेको हो ।

आज (बुधबार) नगरपालिकाको कार्यालयमा विशेष पत्रकार भेटघाट गर्दै नगरभित्रका घरधनी र जग्गा धनीलाई भाडामा लगाएको घर र जग्गाको चैत महिनाको भाडा छुट गर्न अनुरोध गरिने दिक्तेल रुपाकोट मझुवागढी नगरपालिकाका नगरप्रमुख दिपनारायण रिजालले बताए । यस विषम घडिमा एकले अर्कालाई सहयोग गर्नुपर्ने अवस्था रहेको नगरप्रमुख रिजालको भनाई छ ।

यसैगरी, नगरपालिकाले नगरमा दर्ता भएका संघसंस्था तथा व्यवसाय नवीकरण दस्तुरमा २५ प्रतिशत छुट दिने र फोहोरमैला व्यवस्थापन शुल्कमा चैत महिनाको शुल्क छुट दिने जनाएको छ । २०७६ चैत्र १९ गते अपरान्ह ३ :३५ मा प्रकाशित