समायोजन खबर खोटाङ, बराहपोखरी गाउँपालिकाले ३५ बेडको क्वारेन्टाइन निर्माण गरेको छ । विदेशबाट फर्किएका व्यक्तीलाई १४ दिनसम्म राख्नेगरी बराहपोखरी गाउँपालिका–१ बराहपोखरीस्थित शंखेश्वरी माबिमा १८ बेडको, बराहपोखरी गाउँपालिका–४ फाक्टाङको धर्तुङ माबिमा १५ बेडको र बराहपोखरी गाउँपालिका–२ सुन्तलेको धाप्लाङघाटमा २ बेडको क्वारेन्टाइन निर्माण गरिएको हो । उदयपुरको सिनामा पर्ने धाप्लाङघाटमा भने घर भाडामा लिएर क्वारेन्टाइन स्थापना गरिएको गाउँपालिकाका प्रशासन सहायक रमेश पोखरेलले बताए ।
पाँच लाखको सरसफाई सामग्री खरिद
गाउँपालिकाले पाँच लाख बराबरको सरसफाई तथा क्वारेन्टाइन निर्माणका लागि आवश्यक सामग्री खरिद गरेर ल्याएको छ । गाउँ कार्यपालिकाको बैठकबाट बिनियोजन गरिएको रकमबाट ६ वटा स्वास्थ्यचौकी र २ वटा सामुदायीक स्वास्थ्य केन्द्रका लागि आवश्यक थर्मोमिटर, स्टेथेस्कोप, सेनेटाइजर, मास्क, ग्लोव्स, बाल्टीन, साबुन लगायतका सामग्री ल्याइएको हो । सरसफाई लगायतका सामग्रीसँगै विभिन्न वडामा क्वारेन्टीन निर्माणका लागि आवश्यक सामग्री पनि खरिद गरेर ल्याइएको गाउँपालिकाका प्रशासन सहायक पोखरेलले बताए । सरसफाई तथा क्वारेन्टीन निर्माणका लागि आवश्यक सामग्री आईतबार वडा–वडामा पठाइएको छ ।

बराहपोखरी गाउँपालिकाले पनि विदेशबाट फर्किएका व्यक्तीको पहिचान सुरु गरेको छ । क्वारेन्टीनमा राख्नेगरी उनीहरुको खोजी सुरु गरिएको गाउँपालिकाले जनाएको छ । गाउँपालिका भित्रिने सर्वसाधारणको स्वास्थ्य जाँचका लागि धाप्लाङघाट, बंशिलाघाट, कम्पुघाट र आसवालामा हेल्थडेस्क स्थापना गरिएको छ । स्वास्थ्यकर्मी र सुरक्षाकर्मीलाई खाने सुविधासहित हेल्थडेस्कमा खटाइएको गाउँपालिकाले जनाएको छ ।
२०७६ चैत्र १७ गते अपरान्ह ३ : ४५ मा प्रकाशित