चिसाङ शेर्पा खोटाङ, खोटाङको दिक्तेल रुपाकोट मझुवागढी नगरपालिकाले दैनिक ज्यालादारी गर्ने श्रमिकलाई खाद्यन्न सामग्री वितरण गरेको छ । कोरोना भाइरस संक्रमण न्युनिकरणका लागि देश लकडाउन भएपछि रोजागरी गुमेको र विहान वेलुका खानसमेत नपाएका श्रमिकहरुलाई आज (शुक्रबार) खाद्यन्न सामग्री वितरण गरेको हो ।दिक्तेल–खानीडाँडा–आहाले सडक कालोपत्रे गर्ने काम गर्दै आएका मोरङको पथरी शनिश्चरे नगरपालिकाका १९ जना श्रमिकलाई नगरपालिकाले २ सय केजी चामल, २० केजी दाल, ५ केजी खाने तेल, ३ केजी नुन लगायतका खाद्यन्न सामग्री वितरण गरेको नगरपालिकाले जनाएको छ ।

श्रमिकहरुलाई दिक्तेल रुपाकोट मझुवागढी नगरपालिकाका नगरप्रमुख दिपनारायण रिजाल, उपप्रमुख विणादेबी राई, प्रमुख जिल्ला अधिकारी शालिग्राम शर्मा पौडेल, प्रहरी नायब उपरिक्षक बामदेव गौतमले खाद्यन्न सामग्री हस्तान्तरण गरेका थिए ।

नगरपालिकाको १५ वडामा लकडाउनको अवधिमा कोही पनि भोकै बस्न नपरुन भन्ने उद्देश्यले दिनभरी काम गरेर बेलुकाको छाक टार्दै आएका श्रमिकहरुको पहिचान गरेर यसरी नै खाद्यन्न सामग्री उपलब्ध गराइने नगरप्रमुख रिजालले बताए । २०७६ चैत्र १४ गते साँझ ५ : ५३ मा प्रकाशित