समायोजन खबर खोटाङ,
खोटाङको दिप्रुङ चुईचुम्मा गाउँपालिका–१ याम्खामा निर्माण सम्पन्न भएको स्वास्थ्य चौकीको भवन उद्घाटन गरिएको छ । दुई तले भवनको मंगलबार दिप्रुङ चुईचुम्मा गाउँपालिका अध्यक्ष भुपेन्द्र राईले उद्घाटन गरेका हुन् ।

शहरी विकास तथा भवन निर्माण विभाग संघिय आयोजना कार्यान्वयन ईकाइ (भवन) मोरङ्गको दुई करोड ४१ लाख एबं प्राविधिक सहयोगमा सगरमाथा घिमिरे निर्माण सेवा प्रालिले भवन निर्माण गरेको हो । २०७२ पुस २३ गते सम्झौता भई दुई वर्षमा निर्माण सक्नुपर्ने भवनको काम कार्यालयकै दुविधाका कारण पुःन दुई वर्ष म्याद थप निर्माण सम्पन्न भएको निर्माण कम्पनीका प्रतिनिधि कृष्ण प्रसाद घिमिरेले जानकारी दिए ।

यसअघि पूरानो गोदाम हाल प्रहरी चौकी याम्खाको माथिल्लो तलाबाट स्वास्थ्य चौकीको कामकाज भईरहेको थियो । आफ्नै भवन भएपछि सेवा प्रवाहमा सहज हुने जनाइएको छ । स्वास्थ्य चौकीमा आवश्यक सामग्रीहरुको निरन्तर पूर्ति गर्दै जाने गाउँपालिका अध्यक्ष भुपेन्द्र राईले बताए ।

भवन उद्घाटनकाक्रममा स्वास्थ्य चौकी भवन निर्माण गर्न निःशुल्क चार रोपनी जग्गादान गर्नुहुने जग्गदाता नारायण बहादुर राई र हिराशोभा राईलाई सम्मान गरिएको छ । उहाँहरुलाई गाउँपालिका अध्यक्ष राई, उपाध्यक्ष सपना राई, सगरमाथा घिमिरे निर्माण सेवा प्रालिका प्रतिनिधिले सम्मानपत्र हस्तान्तरण गर्दै खादा ओढाएर सम्मान गरेका थिए ।
२०७६ फागुन २० गते बिहान ९ :२० मा प्रकाशित