चिसाङ शेर्पा खोटाङ,
खोटाङको रावावेंशी गाउँपालिकामा सञ्चालन भएको निःशुल्क स्वास्थ्य शिविरबाट दुई सय बढीले सुविधा लिएका छन् । गोरखनाथ गण मुढे ब्यारेकको आयोजना, गाउँपालिकाको व्यवस्थापन तथा जिल्ला अस्पताल दिक्तेल र नेत्र ज्योति संघको सहयोगमा भएको एक दिने शिविरमा दुई सय २४ जनाले सुविधा लिएको हो ।

बिहीबार कुभिण्डेको हरमटारमा भएको शिविरबाट ७९ जना पुरुष र एक सय ४५ जना महिलाले विभिन्न स्वास्थ्य सम्बन्धि सुविधा लिएको रावावेंशी गाउँपालिकाका कर्मचारी नर बहादुर श्रेष्ठले जानकारी दिए । शिविरमा विशेषगरी नाक, कान, घाँटी, आँखाको परिक्षण र औषधी वितरण गरिएको थियो ।

स्वास्थ्य शिविरमा कुभिण्डे, खार्पा, डुम्रेधारापानी, दुवेकोल, हौचुर, लामिडाँडा लगायत आसपासका स्थानीयहरु सेवा लिएका थिए । गाउँमै निःशुल्क स्वास्थ्य परिक्षण तथा उचित परामर्श पाएपछि स्थानीयहरु हर्षित भएका छन् ।
२०७६ फागुन ८ गते राती ९ :२७ मा प्रकाशित