चिसाङ शेर्पा खोटाङ,
राष्ट्रिय प्रजातन्त्र पार्टी संयुक्तका जिल्ला अध्यक्ष धर्मराज पोखरेल नेपाली कांग्रेसमा प्रवेश गरेका छन् । नेपाली कांग्रेस खोटाङको २५ औं जिल्ला कार्य समितिको बैठकको अवसरमा शनिबार पोखरेल नेपाली कांग्रेसमा प्रवेश गरेका हुन् ।

पोखरेललाई वीपी स्मृती भवन दिक्तेलमा कांग्रेस सभापति नरेशकुमार श्रेष्ठ, पूर्व सभापति विष्णुकुमार राई लगायतले पार्टीको झण्डा हस्तान्तरण र अविरजात्रा गर्दै कांग्रेसमा भित्र्याएका हुन् । पार्टीमा भित्र्याएसँगै पोखरेललाई नेपाली कांग्रेस जिल्ला कार्य समितिको उपसभापति पदमा समायोजन गरिएको पार्टी ईच्छुराम रानाले जानकारी दिए ।
लामो समय राप्रपा संयुक्तका राजनीति गरेका पोखरेलले कांग्रेसमा राजनीतिक भविष्य देखेर पार्टी प्रवेश गरेको बताए । मुलुकमा व्याप्त भ्रष्टारचार र वेतिथि मौलाएको छ, अव हामी एक भएर यसको खबरदारी गर्नुपर्छ । यसैको लागि हामी एक हुन आवश्यक थियो । पार्टी प्रवेशपछि पोखरेलले भने ।
पोखरेलसँगै खोटाङ उधोग वाणिज्य संघका पूर्व अध्यक्ष रुद्र गिरी पनि कांग्रेसमा प्रवेश गरेका छन् । गिरीलाई सह–सचिव पद दिइएको छ । कार्यक्रममा गिरी उपस्थित नभए पनि उनको मनोनयन पत्र फोनबाटै वाचन गरेर सुनाइएको थियो । यस्तै, नेकपामा आवद्ध विजयखर्कका लेखनाथ खनाल, धनुश राई, तोयानाथ खनाल, वालकुमार ढकाल, मिलन पोखरेल, सुमन पोखरेल र भक्त शेर राई पनि कांग्रेसमा प्रवेश गरेका छन् ।

यसैगरी,पार्टी प्रवेशसँगै विजयखर्कमा निर्माण हुने गाउँ कार्य समिति पार्टी भवनका लागि निःशुल्क ६ आना २ दाम जग्गा उपलब्ध गराउने सोही स्थानका जग्गादाता लेखनाथ खनाललाई नेपाली कांग्रेस जिल्ला कार्य समितिले सम्मान गरेको छ ।
२०७६ माघ १८ गते अपरान्ह ४ :२४ मा प्रकाशित