चिसाङ शेर्पा खोटाङ,
दिलीप राई सामान्य परिवारमा हुर्केका युवा हुन् । दिक्तेल रुपाकोट मझुवागढी नगरपालिका–१४ बुईपा धिवाका उनी मोटरसाईकलमा उल्टो बसेर एक हातले मोटरसाईकल चलाउँछन् । दाहिने हातमा नेपालको राष्ट्रिय झण्डा र देब्रे हातले मोटरसाईकल हाँक्छन् ।

हाल ३२ वर्ष पुगेका दिलीपले १३ वर्षको उमेरदेखी उल्टो मोटरसाईकाल चलाउन सिकेका हुन् । निक्कै मेहेनत र परिश्रमले अहिले मजाले कुदाउन सकिने उनले बताए । भर्खरै मात्रै बुईपास्थित खेलमैदानमा सम्पन्न अन्तरपालिका स्तरिय पुरुष भलिबल प्रतियोगीताको फाइनलमा उल्टो मोटरसाकईल स्टन्ट देखाएपछि उनको कला बाहिर आएको हो ।

खेलमैदान र निश्चित स्थानमा उल्टो बसेर एक हातले डेढ घण्टासम्म लगातार उनले मोटरसाईकल कुदाएका छन् । प्रतिस्पर्धामामा भाग लिन पाए अन्यभन्दा आफू अब्बल हुने दावि गरे । आर्थिक अभावमा झेलिएका उनले सहयोग पाएमा नेपालीको बहादुरीलाई विश्व सामू चिनाउने बताए । नेपाली भूमिमा जन्म लिईसकेपछि केही गर्नुपर्छ भन्ने मनासय भएका दिलीप एक हातले उल्टो मोटरसाईकल कुदाएर अन्तर्राष्ट्रिय जगतमा नेपाललाई चिनाउने लक्ष्य लिएर हिडेका छन् ।
२०७६ माघ १७ गते बिहान ९ :१२ मा प्रकाशित