चिसाङ शेर्पा खोटाङ,
जिल्ला प्रहरी कार्यालय खोटाङले सालको अवैध काठ र चारजना मानिसलाई नियन्त्रणमा लिएको छ । प्रहरीले रावावेंशी गाउँपालिका–५ दुवेकोलबाट मंगलबार राती ४३.३६ क्युफिट सालको अवैध काठ र ओसारपसारमा संलग्नलाई नियन्त्रणमा लिएको हो ।

रातको समयमा लु ३ त ३९२२ नम्बरको ट्याक्टरमा सालको गोलिया काठ लोड गरी अवैध रुपमा लैजाँदै गरेको अवस्थामा सादा पोशाकमा खटिएका प्रहरीले काठ र मानिसलाई नियन्त्रणमा लिएको जिल्ला प्रहरी कार्यालय खोटाङका प्रहरी नायब उपरिक्षक आमोद कुमार खेरवालले बताए । नियन्त्रणमा लिएका चारजनाको नाम खुलाइएको छैन ।

अवैध काठ र मानिससँगै प्रहरीले स ७ प १६४५ नम्बरको निलो रंगको पल्सर मोटरसाईकल पनि नियन्त्रणमा लिएको छ । नियन्त्रणमा लिइएको काठ, मोटरसाईकल र मानिसलाई आवश्यक अनुसन्धान तथा कारबाहीको लागि जिल्ला बन कार्यालय खोटाङमा बुझाईएको प्रहरीले जनाएको छ ।

प्रारम्भिक अनुसन्धान अनुसार विना ईजाजत, विना प्रमाण काठ ओसारपसार गरिएको देखिएको जिल्ला बन कार्यालय खोटाङका प्रमुख अम्बिका प्रसाद पौडेलले बताए । अनुसन्धान अधिकृत तोकेर छानविन गर्न लगाइएको पौडेलले बताए । चारजना मानिसलाई भने अनुसन्धानको सिलसिलामा प्रहरी हिरासतमा पठाइएको छ ।
२०७६ माघ १५ गते साँझ ६ :१९ मा प्रकाशित