समायोजन खबर खोटाङ,
जिल्लाको हलेसी तुवाचुङ नगरपालिका र उदयपुरको लिम्चुङबुङ गाउँपालिका जोड्ने झोलुंगे पुल निर्माण गरिएको छ । हलेसी तुवाचुङ नगरपालिका–५ दुर्छिम हैदे र लिम्चुङबुङ गाउँपालिका–१ बाँसबोटेको भाते जोड्ने सुनकोसीमा १५८ मिटर लम्बाई भएको झोलुंगे पुल निर्माण गरिएको हो । सस्पेन्सन ब्रिज डिभिजन (एसविडि) पुलचोक काठ्माण्डौंको १ करोड ९ लाखमा निर्माण गरिएको पुल शुक्रबार पुर्वसभाषद पाँचकर्ण राई (पिके)ले उद्घाटन गरेका छन् ।

हालसम्म ढुंगा सञ्चालन हुँदैआएको स्थानमा झोलुंगे पुल निर्माण भएपछि स्थानीयलाई आवत–जावत गर्न सहज भएको छ । पुर्व सभाषद राईकै पहलमा झोलुंगे पुल निर्माण गरिएको दुर्छिमका वडा सदस्य फलामसिं राईले बताए । २०७४ सालमा जगदम्बा निर्माण सेवा हलेसीले पुल निर्माणको ठेक्का सम्झौता गरेको थियो ।

हलेसी तुवाचुङ नगरपालिकाको डिकुवा, जोर्तीघाट, बाईटार चिपटारमा पनि झोलुंगे पुल निर्माण भइरहेको छ । कुर्लेघाट र बाइसेमा पनि झोलुंगे पुल उद्घाटनको तयारी भइरहेको तथा भाटबेँसीको झोलुंगे पुल निर्माणको काम अन्तिम चरणमा पुगेको पुर्वसभाषद राईले बताए ।
२०७६ माघ ११ गते साँझ ६ :०५ मा प्रकाशित