समायोजन खबर खोटाङ,
खोटाङको दिक्तेल–खानीडाँडा–आहाले सडक कालोपत्रेको काम गुणस्तरहिन भएको गुनासो आएको छ । राष्ट्रिय पुःननिर्माण प्राधिकरणको आर्थिक लगानीमा २०७५ साल मंसिर १ गते शिलान्यास गरिएको दिक्तेल–आहाले (१०.७९ किलोमिटर) खण्ड कालोपत्रेको काम सुस्त र गुणस्तरहिन भएको गुनासो आएको हो । गुणस्तरहिन काम भएको गुनासो आएपछि बुधबार प्रदेशसभा सांसद रामकुमार राई, उषाकला राई, जिल्ला समन्वय समितिका प्रमुख बबी चाम्लिङ, नेकपाका सचिव रामप्रसाद दंगाल लगायतको टोलीले सडकको कामको अनुगमन गरेका छन् ।

अनुगमनकाक्रममा सडकको कुनामा बनाइएको ड्रेनमा ढुंगालाई ठाडो बनाएर पर्खाल हालिएको, सिमेन्ट र बालुवाको मात्रा नमिलाइ पर्खाल निर्माण गरिएको, माटो मिसिएको र गुणस्तरहिन बालुवा प्रयोग गरिएको, पर्खालको बाहिर बालुवा सिमेन्टको मसला हालेपनि भित्र खोक्रो छाडिएको, सिमेन्ट–बालुवाबाट बनाइएको पर्खाल र ड्रेनलाई पानीले भिजाउने नगरेको टोलीले जनाएको छ । दिक्तेल र खानीडाँडाकोबीचमा सडकभन्दामुनि ठड्याइएको एक रिटेनिङ वालमा हात नै छिर्ने प्वाल भेटिएको छ । हात छिर्ने प्वाल भेटिएपछि अनुगमनमा संलग्नले पालैपालो हात छिराएका थिए ।

राष्ट्रिय पुःननिर्माण प्राधिकरणको २१ करोड १ लाख ८८ हजार (भ्याट सहित) खर्चमा पुरा गर्नेगरी ठेकेदार कम्पनी याक्तुहाङ साप सिरुवा जेभीले दिक्तेल–आहाले सडक कालोपत्रेको काम जिम्मा लिएको हो । माटो मिसिएको बालुवा तथा एक टिन सिमेन्टसँग दश टिन बालुवा गिटी घोलेर सडकको काममा प्रयोग भइरहेको पाइएपछि राष्ट्रिय पुःननिर्माण प्राधिकरण जिल्ला आयोजना कार्यान्वयन इकाई (अनुदान व्यवस्थापन तथा स्थानीय पुर्वाधार)को कार्यालयले गत पुस ९ गते निर्माण कम्पनीलाई पत्राचार गरेर काम रोक्न लगाइसकेको छ ।
२०७६ पौष २४ गते बिहान ८ :२१ मा प्रकाशित