चिसाङ शेर्पा खोटाङ,
जिल्ला प्रहरी कार्यालय खोटाङले कर्तब्य ज्यान मुद्दाका फरार अभियुक्त तीनजनालाई पक्राउ गरी सार्वजनिक गरेको छ । काठकोे मुस्ली प्रहारबाट हलेसी तुवाचुङ नगरपालिका–९ सल्ले गैरीगुठका २७ वर्षीय रमेश राईको मृत्यु भएपछि फरार भएकालाई नियन्त्रणमा लिई आईतबार पत्रकार सम्मेलन गरेर सार्वजनिक गरेकोे हो ।

सार्वजनिक हुनेमा सोही ठाउँका २७ वर्षीय भबिन राई, २१ वर्षीय अशोक राई र २५ वर्षीय बलराज राई छन् । फरार अभियुक्तहरुलाई विशेष सुराकीको आधारमा प्रहरी चौकी हर्कपुर ओखलढुंगाको सहयोगबाट शनिबार दिउँसो हर्कपुरमा नियन्त्रणमा लिईएको पत्रकार सम्मेलनमा जानकारी गराइएको छ ।

उनीहरुले गत बिहीबार राती साढे १० बजे रमेशलाई मुस्ली प्रहार गरेका थिए । मुस्ली प्रहारबाट घाईते भएका रमेशको हलेसीकै एक क्लिनिकमा उपचारकोक्रममा मृत्यु भएको थियो । अभियुक्तहरुलाई म्यादथप अनुमति लिइ थप अनुसन्धान भइरहेको प्रहरी नायब उपरिक्षक बामदेव गौतमले बताए ।

भूकम्प पुःननिर्माणको घर निर्माण सम्वन्धी काम गरेर फर्कदै गरेका रमेशसँग बाटोमा भेट भएपछि सामान्य बिबादमा झगडा हुँदा उनीहरुले कुटपिट गरेको प्रहरीले जनाएको छ । घट्नामा संलग्न भबिन शसस्त्र प्रहरी जवान हुन् ।
२०७६ मंसिर २९ गते दिउँसो ४ :३१ बजे प्रकाशित