चिसाङ शेर्पा खोटाङ,
खोटाङका पत्रकार दमन राई ‘छैटौ प्रदेश नम्बर १ मानव अधिकार पत्रकारिता पुरस्कार’बाट पुरस्कृत भएका छन् । प्रदेश नम्बर १ मा मानव अधिकारको क्षेत्रमा पत्रकारिताको माध्यमबाट शसक्त रुपमा कलम चलाए वापत पत्रकार राई पुरस्कृत भएका हुन् ।

७१ औं अन्तर्राष्ट्रिय मानव अधिकार दिवसको अवसर पारेर मंगलबार मानव आधिकार मञ्च इलामले इलाम सदरमुकाममा आयोजित कार्यक्रममा जिल्ला समन्वय समितिका प्रमुख गणेशप्रसाद बराल, इलाम नगरपालिकाका नगरप्रमुख महेश बस्नेत र प्रमुख जिल्ला अधिकारी सीताराम कार्कीलगायतले राईलाई नगद १० हजारसहित सम्मानपत्र प्रदान गरेका छन् ।

मञ्चले बिगत ६ वर्षदेखी प्रदान गर्दै आएको मानव अधिकार पत्रकारिता पुरस्कार यो वर्ष राईलाई प्रदान गरिएको आयोजकले जनाएको छ । पत्रकार महासंघ खोटाङ शाखाका अध्यक्ष समेत रहेका पत्रकार रार्ई नागरिक राष्ट्रिय दैनिकमा आबद्ध छन् ।
२०७६ मंसिर २४ गते साँझ ६ :१० मा प्रकाशित