समायोजन खबर खोटाङ,
साकेला गाउँपालिका–३ खिदिमाको वडाध्यक्ष पदका लागि हुने निर्वाचनमा चुनावी सरगर्मी बढेको छ । आगामी मंसिर १४ गते हुने उपनिर्वाचनका लागि नेकपाका तर्फबाट शिवकला राई, नेपाली कांग्रेसका तर्फबाट शुक्रबहादुर तामाङ, समाजवादी पार्टीका तर्फबाट रमेश राई र राप्रपाका तर्फबाट इन्द्रबहादुर खड्का उम्मेद्वार रहेका छन् । रिक्त वडाध्यक्ष पदमा आफ्नो उम्मेद्वारलाई जिताउनका लागि भोट माग्न राजनैतिक दललाई चुनावी चटारो लागेको छ ।

तत्कालिन नेकपा एमालेबाट वडाध्यक्षमा निर्वाचित मणिकुमार राईको निमोनियका कारण गत बैसाख ९ गते मृत्यु भएपछि उपनिर्वाचन मार्फत अर्को वडाध्यक्ष चयन गर्न लागिएको हो । नेकपाले तिनै मणीकुमारको श्रीमती शिवकलालाई उम्मेद्वार उठाएको छ । २०७४ सालमा भएको स्थानीय निर्वाचनमा कांग्रेसले १५८, एमालेले २७९ र माओवादीले २७१ मत ल्याएको थियो । उपनिर्वाचनमा वडाध्यक्ष पदका लागि १३ सय ३ जना मतदाता रहेको जिल्ला निर्वाचन कार्यालय खोटाङले जनाएको छ ।
२०७६ मंसिर ८ गते साँझ ५ :३६ मा प्रकाशित