चिसाङ शेर्पा खोटाङ,
जिल्ला प्रहरी कार्यालय खोटाङले रत्नपार्क र हलेसीमा यात्रु सहायता कक्ष स्थापना गरेको छ । दशैं, तिहार र छठको बेलामा हुने यात्रुको चाप र तोकिएभन्दा बढी भाडादर लिने/नलिने विषयलाई ध्यानमा राखेर प्रहरीले शुक्रबार दिक्तेलको रत्नपार्क र हलेसीमा यात्रु सहायता कक्ष स्थापना गरेको हो । दिक्तेलको रत्नपार्कमा स्थापना गरिएको यात्रु सहायता कक्षको प्रमुख जिल्ला अधिकारी बिष्णुहरि उपाध्यायले उद्घाटन गर्नुभयो ।

चाडवाडका समयमा हुने भीडभाडकाबीचमा असहज यात्रा भएमा उजुरी वा गुनासो गर्ने व्यवस्थाका लागि यात्रु सहायता कक्षा स्थापना गरिएको जिल्ला प्रहरी कार्यालय खोटाङका प्रहीरी नायब उपरिक्षक बामदेव गौतमले बताए । यात्रु सहायता कक्षमार्फत ट्राफिक नियम सचेतना, क्षमताभन्दा बढि यात्रु राखेको, तोकिएभन्दा बढि भाडा लिएको विषयमा चेकजाँच गरिने प्रहरीले जनाएको छ । सहायता कक्षबाट ट्राफिक नियम सम्वन्धी पर्चा वितरणका साथै माइकिङ समेत सुरु गरिएको छ ।
२०७६ असोज १० गते दिउँसो २ :१३ मा प्रकाशित